«Амир Темурнинг ҳарбий-сиёсий салоҳияти» мавзусида «Маънавият ва маърифат» дарси ташкил этилди
2026-04-09 06:45:00 / Янгиликлар
Буюк давлат арбоби ва саркарда Амир Темур таваллудининг 690 йиллигини юртимизда кенг миқёсда нишонланмоқда. Айниқса ҳарбий хизматчилар, ҳуқуқни муҳофаза қилиш органлари ходимлари учун Соҳибқирон тарихини, қолдирган буюк меросини ўрганиш чин маънода ватанпарварлик ҳисобланади.
ИИВ Маданият саройида ҳам вазирлик Марказий аппарати ҳамда соҳавий хизматлар ходимлари иштирокида «Амир Темурнинг ҳарбий-сиёсий салоҳияти» мавзусида «Маънавият ва маърифат» дарси ташкил этилди.
Мазкур тадбирда вазирлик раҳбарияти ва шахсий таркиби иштирок этди. Ўзбекистон Фанлар академияси Тарих институти катта илмий ходими, тарих фанлари бўйича фалсафа доктори, «Маърифат» тарғиботчилар жамияти аъзоси Низомиддин Гулбоев эса ўз маърузаси билан қатнашди.
Маърузачи ўз чиқишида Амир Темурнинг ҳарбий юришлари, стратегик қарорлар қабул қилишдаги ёндашуви ва халқаро сиёсий фаолияти ҳақидаги илмий асосланган маълумотларни иштирокчиларга қизиқарли ва тушунарли тарзда тақдим этди.
Шу билан бирга, тадбир қатнашчилари билан очиқ мулоқот ўтказилиб, мавзу юзасидан савол-жавоблар ташкил этилди ҳамда иштирокчиларнинг билим ва дунёқарашини янада бойитишга хизмат қилди.
Амир Темур таваллудининг 690 йиллиги муносабати билан ички ишлар органларининг барча соҳавий хизматлари, ҳарбий қисм ва таълим муассасаларида худди шундай учрашувлар илмий маърифий тадбирлар давом этмоқда.