Ўзбекистон Республикаси Ички ишлар вазирлиги

Қорақалпоғистон Республикасида ички ишлар органлари фаолиятини янада такомиллаштириш, ходимларнинг хизмат самарадорлигини ошириш ҳамда аҳоли хавфсизлигини таъминлаш масалалари доимий эътибор марказида бўлиб келмоқда. Шу мақсадда вазир ўринбосари, генерал-майор Мирзараҳимов Баходир Юлдошевич томонидан ҳудудларда амалга оширилаётган ишлар ўрганилди.

Хусусан, хизмат сафари доирасида Қорақалпоғистон Республикаси ИИВга қарашли Чимбой, Қораўзак ҳамда Тахтакўпир туманлари ички ишлар бўлимлари ходимларининг хизмат фаолияти атрофлича таҳлил қилинди. Ўрганиш жараёнида жамоат хавфсизлигини таъминлаш, ҳуқуқбузарликларнинг олдини олиш, профилактика ишларини ташкил этиш ҳамда аҳоли мурожаатлари билан ишлаш ҳолатига алоҳида эътибор қаратилди.

Шунингдек, жойлардаги шахсий таркиб билан мулоқотлар ўтказилиб, уларнинг хизматни олиб боришдаги муаммо ва таклифлари тингланди. Ходимларнинг касбий тайёргарлиги, интизоми ва масъулиятини янада ошириш юзасидан тегишли кўрсатмалар берилди. Айрим йўналишларда аниқланган камчиликларни бартараф этиш бўйича масъул раҳбарларга топшириқлар юклатилди.

Вазир ўринбосари томонидан профилактика инспекторлари фаолиятини кучайтириш, замонавий ахборот технологияларидан самарали фойдаланиш, жиноятчиликка қарши курашишда тизимли ёндашувни жорий этиш муҳимлиги таъкидланди. Шу билан бирга, аҳоли билан очиқ мулоқот қилиш, уларнинг ишончини қозониш ички ишлар органлари фаолиятининг устувор йўналишларидан бири экани қайд этилди.

Хизмат сафари якунида берилган топшириқлар ижросини таъминлаш орқали ҳудудларда тинчлик ва осойишталикни мустаҳкамлаш, фуқаролар хавфсизлигини таъминлаш борасидаги ишлар янада юқори босқичга олиб чиқилиши белгиланди.

Транспорт ва туризм объектларида хавфсизликни таъминлаш Департаменти Ахборот гуруҳи