Аҳоли хавфсизлигини таъминлаш ва замонавий таҳдидларга илмий ёндашув: Ички ишлар вазирлиги ишчи гуруҳининг Сурхондарё вилоятидаги ўрганиш ишлари давом этмоқда
2026-04-06 10:10:00 / Янгиликлар
Ички ишлар вазири генерал-лейтенант Азиз Ташпулатов бошчилигидаги ишчи гуруҳининг Сурхондарё вилоятидаги ўрганиш ишлари Денов туманида давом эттирилди. Туманда янги ташкил этилаётган Қўриқлаш департаменти Денов минтақавий ўқув марказида якунига етказилган бунёдкорлик ишлари кўздан кечирилди. Мазкур марказ ҳудудий ички ишлар органлари Қўриқлаш бўлинмаларида хизмат олиб борувчи кадрларни тайёрлашга мўлжалланган бўлиб, тез фурсатда фойдаланишга топширилиши режалаштирилган.
Ички ишлар вазири томонидан таълим тизимига энг замонавий технологияларни жорий этиш, ходимларнинг спорт билан шуғулланишлари, жанговар ва маънавий-маърифий тайёргарликларини ўқув марказининг ўзида такомиллаштириш бўйича кўрсатмалар берилиб, барча масалага илмий ёндашув зарурлиги таъкидланди.
Ишчи гуруҳнинг кейинги манзили Бандихон тумани ИИБ бўлди. Ўзбекистон Республикаси Президентининг 2026 йил 5-январдаги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги 1-сон қарори ижроси бўйича туман ҳуқуқни муҳофаза қилиш органлари томонидан олиб борилаётган ишлар ўрганилиб, келгусида бажарилиши лозим бўлган муҳим вазифалар муҳокама қилинди.
Туман ички ишлар бўлими шахсий таркибига ҳамкорликда ўтказилаётган тадбирларни жадаллаштириш, маҳаллаларда хавфсиз муҳитни яратиш, аҳолининг ҳуқуқ ва манфаатларини муносиб ҳимоя қилиш, энг муҳими Президентимиз томонидан билдирилаётган ишончни оқлаш лозимлиги таъкидланди.
Шу ерда Қўриқлаш хизматининг аҳоли хонадонлари ва қўриқловга олинган объектларни муҳофаза қилиш борасида илғор техникалардан фойдаланган ҳолда олиб бораётган фаолияти ва тизимга киритилаётган янгиликлар тақдимот қилинди.
Қизириқ тумани ИИБ раҳбарияти билан бўлиб ўтган учрашувда ҳам қизил тоифага киритилган маҳаллалардаги ўрганиш ишлари ва кучайтирилган хизмат тартиби, гиёҳвандлик моддаларининг ноқонуний муомаласи ва уюшган жиноятчиликка қарши курашиш бўйича амалга оширилаётган ишлар муҳокама қилинди.
Умуман олганда, Сурхондарё вилояти ҳудудида бугун долзарб бўлган барча хавфсизлик талабларига тўғри ёндашиш, аҳоли муаммоларини тизимли ўрганиш ва илмий таҳлил қилиш, ҳар бир маҳалладаги ўзига хос вазиятдан келиб чиққан ҳолда жиноятчиликни жиловлаш бўйича вазифаларни белгилаб берилди.
Ички ишлар вазирлиги ишчи гуруҳининг ўрганишлари бошқа ҳудудларда ҳам давом эттирилади.