Тошкент шаҳрининг Миробод туманида маҳаллалар хавфсизлигини таъминлаш бўйича устувор вазифалар белгилаб олинди
2026-04-04 12:00:00 / Янгиликлар
Ўзбекистон Республикаси Олий Мажлиси Сенатининг Мудофаа ва хавфсизлик масалалари қўмитаси раиси К. Бурханов ҳамда Ички ишлар вазири ўринбосари генерал майор Б. Ю.Мирзарахимов иштирокида Миробод тумани ҳокимлигида йиғилиш бўлиб ўтди.
Йиғилишда Ўзбекистон Республикаси Президентининг 2026 йил 5 январдаги ПҚ-1-сон қарори ижросини таъминлаш, жумладан, маҳаллаларда хавфсиз муҳитни шакллантириш бўйича 2026 йилнинг биринчи чорагида амалга оширилган ишлар атрофлича муҳокама қилинди.
Тадбирда туман ИИО ФМБ бошлиғи, туман прокурори, мутасадди идора ва ташкилотлар раҳбарлари иштирок этиб, мавжуд ҳолат таҳлил қилинди ҳамда келгусида амалга оширилиши лозим бўлган устувор вазифалар белгилаб берилди.
Асосий эътибор аҳоли хавфсизлигини таъминлаш, жиноятчиликни олдини олиш, профилактика ишларини кучайтириш ва маҳаллаларда барқарор ижтимоий муҳитни яратишга қаратилди.
Шунингдек, К.Бурханов ва Б. Мирзарахимов, туман ҳокими А.Сайфутдинов, туман прокурори Б.Абдуллаев, туман ИИО ФМБ бошлиғи У.Насритдиновлар «Зиёнур» ҳамда «Қўйлиқ ота» маҳаллаларига ташриф буюриб, ушбу ҳудудларда хавфсиз муҳитни таъминлаш борасида амалга оширилаётган ишлар билан яқиндан танишдилар.
Ташриф давомида маҳалла «еттилиги» аъзолари, профилактика инспекторлари ва масъул раҳбарлар билан мулоқот ўтказилиб, мавжуд муаммолар муҳокама қилинди.
Якунда масъулларга аниқ топшириқ ва кўрсатмалар берилиб, маҳаллаларда тинчлик ва хавфсизликни таъминлаш, аҳоли билан ишлаш самарадорлигини ошириш, шунингдек, ҳуқуқбузарликларнинг олдини олишга қаратилган чора-тадбирларни янада кучайтириш зарурлиги таъкидланди.
ИИВ Транспорт ва туризм объектларида хавфсизликни таъминлаш Департаменти Ахборот гуруҳи