Ўзбекистон Республикаси Ички ишлар вазирлиги

Ички ишлар тизимида олиб борилаётган ислоҳотлар доирасида жойлардаги ҳолатни ўрганиш, аҳоли билан очиқ мулоқот қилиш ва муаммоларни жойида ҳал этишга алоҳида эътибор қаратилмоқда. Ана шундай амалий сафарлардан бири доирасида вазир ўринбосари генерал-майор Баходир Мирзарахимов томонидан Миробод туманидаги маҳаллаларда ўрганиш ишлари амалга оширилди.

Жумладан, туман ҳудудида жойлашган Минг ўрик МФЙ ҳамда Мовароуннаҳр МФЙдаги ижтимоий-ҳуқуқий муҳит, жамоат хавфсизлигини таъминлаш борасида амалга оширилаётган ишлар атрофлича кўриб чиқилди. Сафар давомида маҳалла раислари, профилактика инспекторлари ҳамда кенг жамоатчилик вакиллари билан учрашувлар ўтказилди.

Ўрганишлар жараёнида, аввало, ҳуқуқбузарликларнинг олдини олиш, айниқса ёшлар ўртасида жиноятчиликни камайтириш, оилалардаги ижтимоий муаммоларни барвақт аниқлаш ва бартараф этиш масалаларига урғу берилди. Шунингдек, ҳар бир хонадон кесимида манзилли ишлаш, “темир дафтар”, “ёшлар дафтари” ва “аёллар дафтари” орқали эҳтиёжманд аҳоли қатламига амалий ёрдам кўрсатиш ҳолати таҳлил қилинди.

Маҳаллаларда жамоат тартибини сақлаш, тунги вақтда хавфсизликни таъминлаш, видеокузатув воситаларидан самарали фойдаланиш, профилактика тадбирларини кучайтириш бўйича мавжуд камчиликлар ҳам кўрсатиб ўтилди. Масъул раҳбарларга аниқ вазифалар юклатилиб, уларнинг ижросини таъминлаш юзасидан тегишли топшириқлар берилди.

Шунингдек, аҳоли билан мулоқот чоғида фуқароларни қийнаётган масалалар тингланиб, уларни ҳал этиш бўйича тегишли идоралар билан ҳамкорликда амалий чоралар белгилаб олинди. Бу каби учрашувлар аҳолининг давлат органларига бўлган ишончини янада мустаҳкамлашга хизмат қилаётгани таъкидланди.

Умуман олганда, мазкур ўрганишлар ҳудудларда тинчлик ва осойишталикни таъминлаш, ҳуқуқбузарликларнинг олдини олиш ва аҳоли фаровонлигини оширишга қаратилган ишларни янги босқичга олиб чиқишга хизмат қилади.

ИИВ Транспорт ва туризм объектларида хавфсизликни таъминлаш Департаменти Ахборот гуруҳи