ИИВ раҳбарияти томонидан Тошкент минтақаси темир йўл транспортида хавфсизликни таъминлаш бошқармаси ходимларига бир қатор вазифалар белгиланди
2026-03-28 06:20:00 / Янгиликлар
Тошкент минтақаси темир йўл транспортида хавфсизликни таъминлаш бошқармасида хизмат самарадорлигини ошириш, жамоат тартибини мустаҳкамлаш ҳамда транспорт инфратузилмасини ишончли ҳимоя қилишга қаратилган муҳим йиғилиш бўлиб ўтди.
Йиғилишда вазир ўринбосари, генерал-майор Баходир Мирзарахимов иштирок этиб, соҳада амалга оширилаётган ишлар таҳлил қилинди ва мавжуд муаммолар юзасидан аниқ вазифалар белгилаб берилди.
Таъкидланишича, темир йўл транспорти стратегик аҳамиятга эга бўлган тармоқ ҳисобланиб, унинг хавфсизлигини таъминлаш давлат хавфсизлигининг муҳим таркибий қисми саналади. Шу боис, ходимлардан юқори масъулият, доимий ҳушёрлик ва касбий маҳоратини ошириш талаб этилади.
Йиғилиш давомида қуйидаги устувор вазифалар белгилаб берилди:
- темир йўл объектлари ва инфратузилмасини ишончли қўриқлашни кучайтириш;
- йўловчилар хавфсизлигини таъминлаш, жамоат тартибини қатъий назорат қилиш;
- ҳуқуқбузарликларнинг олдини олишга қаратилган профилактик тадбирларни кенгайтириш;
- замонавий ахборот технологиялари ва видеокузатув тизимларидан самарали фойдаланиш;
- ходимларнинг касбий тайёргарлигини ошириш ва хизмат интизомини мустаҳкамлаш.
Шунингдек, генерал-майор Баходир Мирзарахимов томонидан ҳар бир ходим ўз хизмат вазифасига виждонан ёндашиши, фуқаролар билан мулоқотда одоб-ахлоқ қоидаларига қатъий риоя қилиши лозимлиги алоҳида қайд этилди.
ИИВ Транспорт ва туризм объектларида хавфсизликни таъминлаш департаменти Ахборот гуруҳи