Сурхондарёда Ички ишлар вазири ўринбосари томонидан ўтказилган сайёр қабулда аҳоли мурожаатлари атрофлича кўриб чиқилиб, муаммолар тизимли ҳал қилишга қаратилган вазифалар белгилаб олинди
2026-03-27 20:10:00 / Янгиликлар
Давлатимиз раҳбари томонидан белгилаб берилган устувор вазифалардан бири — аҳоли билан очиқ ва самарали мулоқотни тизимли равишда йўлга қўйишдан иборат.
Мазкур йўналишда ички ишлар органлари томонидан фуқаролар билан бевосита мулоқотни таъминлаш, аҳоли мурожаатлари ва эҳтиёжларини атрофлича ўрганиш, келиб тушган ариза ва таклифларни қонунчилик талаблари асосида ўз вақтида кўриб чиқиш ҳамда улар юзасидан аниқ чора-тадбирлар белгилаш бўйича изчил ишлар амалга оширилмоқда.
Жорий йилнинг 26 март куни Ички ишлар вазирининг комплаенс ва коррупцияга қарши ички назорат бўйича ўринбосари полковник Рустам Мирзаев томонидан сайёр қабул ўтказилди.
Қабул Ўзбекистон Республикаси Президентининг Сурхондарё вилоятидаги Халқ қабулхонаси биносида бўлиб ўтди.
Қабул давомида ички ишлар органлари тизимида коррупцияга қарши курашиш, хизмат интизоми, қонунийликка риоя этиш, хизмат фаолиятида шаффофликни таъминлаш, тергов ва суриштирув жараёнлари, ишга жойлашиш ва қайта тиклаш, йўл ҳаракати хавфсизлиги, ҳамда фуқароларнинг қонуний ҳуқуқ ва манфаатларини ҳимоя қилиш билан боғлиқ масалалар юзасидан мурожаатлар кўриб чиқилди.
Эътиборли жиҳати шундаки, мурожаатларнинг аксарияти қабул жараёнининг ўзидаёқ ижобий ҳал этилди. Қўшимча ўрганиш талаб этган масалалар эса масъулларга бириктирилиб, уларнинг ижроси алоҳида назоратга олинди.
Бундай очиқ мулоқотлар аҳолининг дардини эшитиш, муаммоларига ечим топиш ва давлат идораларига бўлган ишончни янада мустаҳкамлашга хизмат қилмоқда.