Қашқадарё вилояти Нишон туманида хавфсизликни таъминлашга қаратилган манзилли ўрганишлар ва амалий чора-тадбирлар самарадорлиги оширилмоқда
2026-03-24 12:30:00 / Янгиликлар
Жамиятда тинчлик ва осойишталикни таъминлаш, жиноятчиликнинг олдини олиш ҳамда аҳоли учун хавфсиз муҳит яратиш бугунги куннинг энг устувор вазифаларидан бири ҳисобланади. Бу борада ички ишлар органлари томонидан жойларда манзилли ўрганишлар ва амалий чора-тадбирлар изчил амалга оширилмоқда.
Хусусан, вилоят ИИБ бошлиғи полковник Абдувоҳид Исмоилов томонидан Нишон туманида хизмат фаолияти ва хавфсизлик чораларининг самарадорлиги юзасидан ўрганишлар олиб борилди. Ўрганишлар давомида туманнинг “Кимёгар” маҳалласида хонадонларни қўриқловга олиш ҳамда ҳудудни замонавий видеокузатув камералари билан жиҳозлаш масалалари атрофлича кўриб чиқилди. Мазкур йўналишда амалга оширилаётган ишлар таҳлил қилиниб, уларнинг самарадорлигини ошириш бўйича аниқ вазифалар белгилаб берилди.
Шунингдек, “Каптарли” МФЙ ҳудудида жойлашган бозорда ҳам ўрганишлар ўтказилиб, бозор ҳудудидаги 2 та объектда видеокузатув камераларини ўрнатиш ва уларни қўриқловга олиш бўйича зарур чоралар белгилаб олинди. Тадбир давомида вилоят ИИБ бошлиғи томонидан туман ҳокими, туман ИИБ бошлиғи ҳамда туман прокурорига бозорларда содир этилиши мумкин бўлган жиноятларнинг олдини олиш, жамоат тартибини сақлаш ва хавфсизликни таъминлаш юзасидан масъулларга аниқ кўрсатма ва йўриқномалар берилди. Бу каби манзилли ўрганишлар жойларда хавфсизликни таъминлаш, аҳоли фаровонлиги ва тинчлигини мустаҳкамлашга хизмат қилиши билан аҳамиятлидир.
Қашқадарё вилояти ИИБ Ахборот хизмати