ИИВ ҳузуридаги Миграция ва персоналлаштириш департаменти раҳбарияти «Пайшанба – Ёшлар куни» доирасида талабалар билан очиқ мулоқот ўтказди
2026-03-20 12:00:00 / Янгиликлар
«Пайшанба – Ёшлар куни» доирасида ташкил этилаётган учрашувлар ёшлар билан очиқ мулоқот қилиш, уларнинг муаммо ва таклифларини ўрганишда муҳим аҳамият касб этмоқда.
Худди шу мақсадда ташкил этилган навбатдаги «Раҳбар ва ёшлар учрашуви» да Ўзбекистон Республикаси Ички ишлар вазирлиги ҳузуридаги Миграция ва персоналлаштириш департаменти бошлиғи, полковник У.Ташходжаев ҳамда Қарши давлат техника университети ректори Шерзод Неъматов иштирок этишди.
Қарши давлат техника университетида таҳсил олаётган талабалар билан «Ватанпарварлик ва ёшларни Ватанга муҳаббат руҳида тарбиялаш» мавзусида давра суҳбати ўтказилди.
Суҳбат давомида мамлакатимизда ёшларнинг ҳуқуқ ва манфаатларини ҳимоя қилиш, уларнинг билим олиши, касб-ҳунар эгаллаши, тадбиркорлик ва спорт билан шуғулланиши учун яратилаётган имкониятлар ҳақида атрофлича сўз юритилди.
Шунингдек, ташқи меҳнат миграцияси масалаларига алоҳида тўхталиб, хорижга чиқиш ва у ерда бўлиш тартиблари юзасидан ёшларга тушунчалар берилди.
Якунда талабаларни қизиқтирган барча саволларга жавоблар қайтарилиб, уларга ҳуқуқий маданиятни ошириш, турли ёт ғоялар таъсирига тушиб қолмаслик бўйича муҳим тавсиялар берилди.
Албатта, бу каби мулоқотлар ёшларнинг фаол фуқаролик позициясини мустаҳкамлаш, уларни ватанпарварлик руҳида тарбиялашга хизмат қилмоқда.
Ўзбекистон Республикаси Ички ишлар вазирлиги ҳузуридаги Миграция ва персоналлаштириш департаменти