ИИВ раҳбарияти томонидан Наманган вилоятида Наврўз умумхалқ байрами ҳамда Рамазон Ҳайити байрамлари хавфсиз ўтказиш масалалари ўрганилди
2026-03-19 17:00:00 / Янгиликлар
Наманган вилоятида жамоатчилик ва миллий байрамларнинг тинчлик ва тартиб билан ўтказилишини таъминлаш мақсадида катта тайёргарлик ишлари олиб борилмоқда. Жорий йилда Наманган вилоятида Наврўз умумхалқ байрами ҳамда Рамазон Ҳайити байрамлари муносабати билан ташкил этилиши режалаштирилган тадбирларнинг хавфсизлиги ва самарали ўтказилиши учун махсус ўрганишлар амалга оширилди.
Ўрганишлар Ички ишлар вазирининг ўринбосари, генерал-майор Баходир Мирзарахимов раҳбарлигида бўлиб Наманган вилоятида жойлашган Косонсой тумани-Ёшлар боғи, Янгиқўрғон тумани- Нанай масжид, Янгиқўрғон Чегара ҳудуди ҳамда Чортоқ тумани- Сирли масжидлари ўрганилди. Мақсад – байрамлар вақтида оммавий тадбирлар, бозорлар, маданий ва диний масканларда аҳолининг хавфсизлигини таъминлаш, фавқулодда ҳолатларнинг олдини олиш ва ички ишлар органлари ҳамда маҳаллий ҳокимиятлар фаолиятини мувофиқлаштиришдан иборат.
Ўрганишлар доирасида қуйидаги масалаларга алоҳида эътибор қаратилди:
- Хавфсизликни таъминлаш: Наврўз ва Рамазон Ҳайити тадбирлари вақтида кўплаб одамлар йиғиладиган жойларда оммавий хавфсизлик чоралари кўриш.
- Транспорт ва йўл ҳаракати назорати: Шаҳар ва туман марказларида йўл ҳаракати ва транспортни мувофиқлаштириш.
- Жамоатчилик ва ҳокимиятлар ҳамкорлиги: Маҳалла ва туман ҳокимликлари, ижтимоий фаоллар билан биргаликда тадбирларнинг тартибли ўтказилишини таъминлаш.
- Фавқулодда вазиятларга тайёргарлик: Ёқилғи ва ёруғлик тизимлари, тиббий ёрдам ва фавқулодда ҳолатлар хизмати дастурлари текширилди.