Ўзбекистон Республикаси Ички ишлар вазирлиги

Ўзбекистон Республикаси Вазирлар Маҳкамасининг 2025 йил 28 августдаги 543-сон қарорига мувофиқ, ички ишлар органларида кўп йиллар самарали хизмат қилган ва пенсия ҳуқуқини олган ходимлар, шунингдек, вафот этган пенсионерларнинг оила аъзоларига хизмат хонадонларини бепул хусусий мулк сифатида топшириш маросими бўлиб ўтди.

Мазкур тадбирда Ўзбекистон Республикаси Ички ишлар вазири ўринбосари полковник Д.Н. Саттаров, соҳа фахрийлари, ички ишлар органлари ходимлари ҳамда уларнинг оила аъзолари иштирок этдилар.

Тадбир аввалида сўзга чиққан вазир ўринбосари барча иштирокчиларни яқинлашиб келаётган Наврўз умумхалқ байрами ҳамда Рамазон ҳайити муносабати билан самимий муборакбод этди. Шунингдек, хизмат хонадонларининг топширилиши ички ишлар органларида хизмат қилишнинг машаққатли, бироқ юксак шараф ва масъулият талаб этувчи вазифа эканлигининг муносиб эътирофи эканини алоҳида таъкидлади.

Шу билан бирга, сўнгги йилларда ички ишлар органлари фаолиятини тубдан такомиллаштириш, уни ҳақиқий халқчил тизимга айлантириш мақсадида амалга оширилаётган кенг кўламли ислоҳотлар ўзининг амалий самарасини бераётгани қайд этилди. Айниқса, давлатимиз тарихида илк бор вазирлик тизимида узоқ йиллар хизмат қилган пенсионерлар учун уй-жойга эгалик қилиш имконияти яратилгани муҳим аҳамиятга эга экани таъкидланди.

Тадбир давомида ички ишлар органларида 20 йилдан ортиқ хизмат қилган 15 нафар ходим, пенсия ҳуқуқи билан Қуролли Кучлар резервига бўшатилган 95 нафар пенсионер, шунингдек, 7 нафар вафот этган пенсионерларнинг оила аъзоларига ўзларининг шахсий хонадонлари топширилди.

Мазкур тадбир мамлакатимизда қабул қилинаётган қарорлар ва яратилаётган имтиёзлар барча ҳудудларда изчил ва самарали амалга оширилаётганининг яна бир ёрқин ифодаси бўлди.