ИИВ раҳбарияти томонидан Тошкент шаҳри Миробод туманида жойлашган “Тонг юлдузи” маҳалласида ўрганишлар олиб борилди
2026-03-16 19:30:00 / Янгиликлар
Ўзбекистон Республикаси Ички ишлар вазири ўринбосари, генерал-майор Баҳодир Мирзараҳимов томонидан Тошкент шаҳри, Миробод тумани ҳудудида жойлашган “Тонг юлдузи” маҳалласида жамоат хавфсизлигини таъминлаш ва ҳуқуқбузарликларнинг олдини олиш борасида амалга оширилаётган ишлар ҳамда Миробод тумани идоралараро тезкор штаби иш фаолияти ўрганилди.
Ўрганишлар давомида маҳалладаги криминоген вазият, профилактика ишларининг самарадорлиги ҳамда аҳоли билан олиб борилаётган манзилли ишлар атрофлича таҳлил қилинди. Шунингдек, профилактика инспекторлари фаолияти, маҳалла фаоллари ва мутасадди идоралар билан ҳамкорлик ҳолатига алоҳида эътибор қаратилди.
Ташриф давомида маҳалла фаоллари, ёшлар ва фуқаролар билан очиқ мулоқот ташкил этилди. Суҳбатлар чоғида аҳолини қийнаётган ижтимоий масалалар, ёшлар бандлиги, ҳуқуқбузарликларнинг олдини олиш ва хавфсиз муҳитни таъминлаш бўйича фикр-мулоҳазалар тингланди.
Шу билан бирга, масъул ходимларга профилактика ишларини янада кучайтириш, ҳар бир хонадон кесимида манзилли иш олиб бориш, ёшлар билан ишлашни тизимли ташкил этиш ҳамда маҳалла ва ҳуқуқни муҳофаза қилувчи идоралар ўртасидаги ҳамкорликни янада мустаҳкамлаш юзасидан тегишли топшириқлар берилди.
Бундай ўрганишлар ҳудудларда тинчлик ва осойишталикни таъминлаш, жамоат хавфсизлигини мустаҳкамлаш ҳамда аҳоли муаммоларини жойида ҳал этишда муҳим аҳамият касб этади.
ИИВ Транспорт вa туризм объектларида хавфсизликни таъминлаш департаменти Ахборот гуруҳи