Қўриқлаш хизмати фаолиятидан. Қалқон бор — қалъа бут, қўрғон – саломат
2026-03-16 14:20:00 / Янгиликлар
Кун ботиб, шаҳар узра оқшом чўкканда, чироқлар ўчиб минглаб юртдошларимиз ширин уйқу оғушига кетганда ҳам, кимлардир ҳали-ҳамон сергак, кимлардир эса ҳамон остонада маҳкам турибди.
Бугун Наманганнинг ҳар бир маҳалласида, ҳар бир ишлаб чиқариш объектида «Сифат, ишонч, хавфсизлик» тамойили шунчаки жарангдор шиор эмас, балки ҳаётий заруратга айланди.
Хўш, бугун ушбу эзгу тамойил вилоятимиз ҳудудида қандай ифода топмоқда? Вилоят ИИБ ҳузуридаги Қўриқлаш хизмати ходимларининг сергак нигоҳи ва замонавий технологиялар уйғунлиги Наманган тинчлигига қандай ҳисса қўшмоқда?
Давр билан ҳамқадам
Илгари «қўриқлаш» деганда, кўз олдимизда фақат дарвоза олдида турган посбон гавдаланарди. Бугун эса бу тушунча тарихга айланди. Замонавий қўриқлаш тизими нафақат инсон омили, балки юқори технологиялар ва тезкор ҳаракатланувчи гуруҳларнинг яхлит, мустаҳкам занжиридир.
Давлатимиз раҳбарининг соҳани ислоҳ қилишга доир қарорлари тизим зиммасига улкан масъулият юклади.
Қўриқлаш хизмати томонидан олиб борилаётган кенг қамровли ислоҳотлар ва тизимли тарғибот ишлари фуқаролар онгида муҳим бир ҳақиқатни шакллантиряпти: мулк дахлсизлиги – тараққиёт ва оилавий бахтнинг пойдеворидир. Бугун тадбиркорлар ва оддий фуқароларнинг тизимга бўлган ишончи кескин ортганини қуруқ сўзлар эмас, балки салмоқли рақамлар исботлаб турибди.
Вилоятда биргина халқ хўжалиги ва хусусий сектор йўналишида янгидан қўриқловга олинган объектлар сони 4 537 тага кўпайгани диққатга сазовор. Бу рақамларнинг ўсиши натижасида умумий кўрсаткич 5 762 тадан 10 299 тага етди. Бу вилоят иқтисодиётининг қарийб ҳар бир бўғини, ҳар бир корхона ва иншооти ишончли «қалқон» остига олинганидан далолатдир. Бу минглаб иш ўринлари ва миллионлаб сармояларнинг профессионал ҳимояси демакдир.
Янги қўриқловга олинган 3 060 та хонадон ҳисобига жами кўрсаткич 7 672 тага етди. Кўрсатилган рақамлар ортида минглаб оилаларнинг хотиржамлиги ётибди.
Вақт билан пойга
Вилоят бўйлаб тезкор ҳаракатланувчи гуруҳлар сонининг 35 тадан 42 тага оширилиши шунчаки сонлар ўзгариши эмас. Бу вилоятнинг энг чекка нуқтасидан келган «ташвишли» сигналга ҳам саноқли дақиқалар ичида етиб бориш, хавфнинг йўлини тўсиш ва вазиятни тўлиқ назоратга олиш имкониятидир.
Тизимнинг нақадар талабгор ва ҳаётий эканини ўтган йилнинг 1 апрелидан йил якунигача бўлган даврдаги кўрсаткичлар яққол исботлайди: объектлар салмоғи 818 тадан 1 917 тага етди. Бир йилга етмаган вақт ичида 1 099 та янги объектнинг қўшилиши халқимиз ва тадбиркорларимиз ўз тақдирини профессионалларга ишониб топшираётганининг маҳсулидир. Техник қўриқлов йўналишида ҳам ўсиш суръатлари юқори — объектлар сони 8 382 тага, фуқаролар хонадонлари эса 7 672 тага етказилди.
Юксак масъулият
Ўтган йил давомида вилоят бўйича қайд этилган 4 355 та ўғрилик жиноятининг фош этилиши ва олди олинишида ушбу тизимнинг ҳиссаси беқиёс бўлди. Бу рақамлар ортида юзлаб жиноятларнинг бартараф этилиши ва минглаб фуқароларнинг мулки омон қолгани ётибди. Маъмурий жавобгарлик тўғрисидаги кодекснинг 36 та моддаси бўйича берилган янги ваколатлар соҳа ходимлари учун нафақат ҳуқуқий куч, балки юксак масъулиятдир.
Йил давомида аниқланган 2 046 та ҳуқуқбузарлик ҳолати жамиятда тартиб-интизомни мустаҳкамлашга хизмат қилди. 189 та ҳолатда мулкни талон-торож қилишга чек қўйилиб, 55 миллион сўмлик бойликлар ўз эгаларига қайтарилди. Бу эса тизимнинг «инсон қадри учун» деган олижаноб ғояга содиқлигининг исботидир.
Ўтган даврдаги 62 та жиноий ҳолатнинг фош этилиши, жумладан, 30 нафар қидирувдаги хавфли шахснинг қўлга олиниши, 26 та гиёҳвандлик моддалари айланишига чек қўйилиши вилоятимиздаги жиноятчилик занжирини узиб ташлади. Зеро, қўлга олинган ҳар бир жиноятчи содир этилмай қолган навбатдаги жиноятнинг, асраб қолинган навбатдаги тақдирнинг гаровидир.
Жаҳонгир Тўхтасинов, ўз мухбиримиз. «Постда»
Наманган вилояти