Ўзбекистон Республикаси Ички ишлар вазирлиги

Метрополитен тизимида жамоат хавфсизлигини таъминлаш йўлида фидокорона хизмат олиб бораётган ходимларга байрам табриги йўлланди. Ички ишлар вазири ўринбосари, генерал-майор Баходир Мирзарахимов Метрополитенда хавфсизликни таъминлаш бошқармаси ходимларини Наврўз айёми ҳамда Рамазон Ҳайити байрамлари муносабати билан самимий табриклади.

Тадбир давомида сўзга чиққан вазир ўринбосари метрополитен тизимида хизмат қилаётган ходимларнинг масъулиятли ва шарафли вазифани бажариб келаётганини таъкидлади. Уларнинг кундалик меҳнати йўловчилар хавфсизлигини таъминлаш, жамоат тартибини сақлаш ҳамда пойтахт транспорт инфратузилмасининг барқарор ишлашида муҳим аҳамият касб этишини қайд этди.

Генерал-майор Баходир Мирзарахимов ўз нутқида ходимларнинг фидойилиги, ҳушёрлиги ва хизматга садоқати юқори баҳоланишини билдириб, уларнинг келгусидаги фаолиятида ҳам омад ва зафарлар тилади. Шунингдек, байрамлар муносабати билан ходимлар ва уларнинг оила аъзоларига тинчлик, фаровонлик ҳамда сиҳат-саломатлик тилади.

Тадбир давомида ходимларга байрам кунларида хизматни янада ҳушёрлик билан ташкил этиш, жамоат тартибини ишончли сақлаш ҳамда фуқаролар хавфсизлигини таъминлаш бўйича муҳим вазифалар белгилаб берилди. Шунингдек, жамоат тартибини таъминлаш ҳамда байрамларни кўнгилдагидек ўтказиб олиш мақсадида масъул ходимларга тегишли кўрсатмалар берилди.

Шу билан бирга, вазир ўринбосари метрополитен ҳудудида олиб борилаётган қурилиш ва ободонлаштириш ишлари билан ҳам яқиндан танишди. Амалга оширилаётган бунёдкорлик ишлари, янги инфратузилма лойиҳалари ҳамда йўловчилар учун яратилаётган қулайликлар юзасидан мутасаддиларнинг ахборотлари тингланди.

Тадбир якунида хизмат вазифаларини намунали бажараётган бир гуруҳ ходимларга миннатдорчилик билдирилди ҳамда уларнинг келгусидаги фаолиятига муваффақиятлар тиланди.

ИИВ Транспорт вa туризм объектларида хавфсизликни таъминлаш департаменти Ахборот гуруҳи