ИИВ раҳбарияти томонидан Тошкент шаҳар ИИББнинг Вояга етмаганларга ижтимоий-ҳуқуқий ёрдам кўрсатиш маркази фаолияти ўрганилди
2026-03-14 09:00:00 / Янгиликлар
Ўзбекистон Республикаси Ички ишлар вазирининг биринчи ўринбосари, генерал-майор Рустам Джураев Тошкент шаҳар ИИББ Вояга етмаганларга ижтимоий-ҳуқуқий ёрдам кўрсатиш марказига ташриф буюрди.
Ташриф давомида у болалар учун яратилган шароитлар ҳамда марказда вояга етмаганларга ижтимоий ва ҳуқуқий ёрдам кўрсатиш борасида амалга оширилаётган ишлар билан танишди.
«Беш ташаббус» дастури доирасида ташкил этилган янги кабинетлар, шунингдек, устахоналар (деразагарлик ва тикувчилик) ҳамда IT-синф тақдим этилди.
Шунингдек, тарбияланувчилар учун замонавий спорт зали ҳам ташкил этилган бўлиб, у янги спорт жиҳозлари билан таъминланган.
Ташриф давомида «Хавфсиз оила» лойиҳасига алоҳида эътибор қаратилди. Ушбу лойиҳа ўтган йил Тошкент шаҳар тажрибаси асосида амалиётга жорий этилган.
Марказ ходимлари қийин аҳволдаги оилалар ва уларнинг фарзандлари билан олиб борилаётган ишлар, шунингдек, уларга кўрсатилаётган қўллаб-қувватлаш чоралари ҳақида маълумот беришди.
Оилавий муносабатларни мустаҳкамлаш ҳамда вояга етмаганларнинг ҳуқуқ ва манфаатларини ҳимоя қилишда профилактик ва ижтимоий ишларнинг аҳамияти алоҳида таъкидланди.
Марказ фаолияти билан танишган раҳбар мавжуд муаммоларни бартараф этиш ва иш самарадорлигини янада ошириш бўйича амалга оширилиши лозим бўлган вазифаларни белгилаб берди.
Шунингдек, вояга етмаганларнинг ижтимоий мослашувини таъминлаш ва уларнинг тезроқ фаровон ҳаётга қайтишига кўмаклашиш мақсадида тегишли чора-тадбирлар белгиланди.
ИИВ ЖХД Ахборот хизмати