Сирдарё вилояти ИИБда маъмурий ишларни судга юбориш амалиётини такомиллаштириш масалалари муҳокама қилинди
2026-03-12 18:15:00 / Янгиликлар
Сирдарё вилояти Ички ишлар бошқармасида маъмурий ҳуқуқбузарликлар бўйича материалларни судга ўтказиш амалиётини янада такомиллаштиришга бағишланган ўқув семинари ташкил этилди.
Семинар давомида суд органларига келиб тушаётган маъмурий иш ҳужжатлари таҳлил қилиниб, тергов ва терговга қадар суриштирув жараёнида учраётган камчиликлар, ҳужжатларни расмийлаштириш давомида йўл қўйилаётган хатолар кенг муҳокама қилинди.
Хусусан, маъмурий баённомаларни расмийлаштириш, далилларни тўғри қайд этиш, иш материалларини тўлиқ шакллантириш ҳамда уларни судга белгиланган тартибда ва муддатларда юбориш масалаларига алоҳида эътибор қаратилди.
Қайд этиш керакки, ушбу ўқув семинари маъмурий ишларни юритиш сифатини ошириш, ҳужжатларни расмийлаштиришда ягона амалиётни шакллантириш ҳамда ички ишлар органлари ва суд тизими ўртасидаги ҳамкорликни янада мустаҳкамлашга замин яратади.
Сирдарё вилояти ИИБ Ахборот хизмати