Избоскан туманида хизматда намуна кўрсатаётган ходимлар Андижон вилояти ИИБ бошлиғи томонидан рағбатлантирилди
2026-03-07 13:10:00 / Янгиликлар
Андижон вилояти ИИБ бошлиғи, полковник Санжар Джабаров Избоскан тумани ички ишлар бўлимида бўлиб, ҳудудда жиноятчилик ва ҳуқуқбузарликларнинг барвақт олдини олиш, жамоат тартибини мустаҳкамлаш ҳамда аҳоли хавфсизлигини таъминлаш борасида амалга оширилаётган ишлар юзасидан йиғилиш ўтказди.
Учрашув давомида жорий йил бошидан буён маҳаллаларда ҳуқуқбузарликларнинг олдини олишга қаратилган чора-тадбирлар натижасида бир қатор ижобий кўрсаткичларга эришилганлиги қайд этилиб, бу борадаги саъй-ҳаракатларни изчил давом эттириш зарурлиги таъкидланди.
Тадбирда жамоат тартибини сақлаш, фуқаролар хавфсизлиги ва осойишталигини таъминлаш, ҳуқуқбузарликларнинг олдини олиш ҳамда содир этилган жиноятларни фош этишда хизмат вазифаларини сидқидилдан бажариб келаётган бир гуруҳ ходимлар алоҳида эътироф этилди. Уларнинг хизмат фаолиятидаги ташаббускорлиги ва масъулияти инобатга олиниб, пул мукофотлари билан рағбатлантирилди. Шунингдек, уларни тарбиялаб вояга етказган ота-оналарига миннатдорлик рамзи сифатида ташаккурномалар тантанали равишда топширилди.
Йиғилиш якунида яқинлашиб келаётган 8 март — Халқаро хотин-қизлар куни муносабати билан тадбирга ташриф буюрган барча аёллар байрам билан самимий табрикланиб, уларга эсдалик совғалари улашилди.
Андижон вилояти ИИБ Ахборот хизмати