Тошкент шаҳар ИИББда хизмат вазифасини бажариш чоғида мардларча ҳалок бўлган Ҳосилбек Эшназаровнинг хотира мажмуаси очилди
2026-02-01 13:00:00 / Янгиликлар
Тошкент шаҳар ИИББда хизмат вазифасини бажариш чоғида ҳалок бўлган кичик сержант Ҳосилбек Эшназаров хотирасига бағишлаб ёдгорлик мажмуаси очилди.
Маросимда Ички ишлар вазирлиги раҳбарияти, пойтахт жамоатчилиги, Ҳосилбек билан елкама-елка хизмат хизмат қилган сафдошлари ва оила аъзолари иштирок этди.
Ички ишлар бош бошқармасида хизмат вақтида ҳалок бўлган ходимлар лавҳи яна биттага кўпайди. Жасоратли ўғлонларнинг пок хотираси ёд этилиб уларнинг пойига гулчамбарлар қўйилди.
Ҳосилбек Эшназаровнинг порлоқ хотирасига эҳтиром кўрсатиш тадбири давомида Ички ишлар вазири томонидан унинг машаққатли хизмат фаолияти, Президентимиз томонидан эътироф этилганлиги ва ҳар бир ходимга ўрнак бўлиши таъкидланди.
Мана шундай бурчга садоқатнинг энг юксак намунасини намоён етган фарзандни вояга етказган Бекназар ота ва Дилором опага шахсий таркиб номидан яна бир бор миннатдорлик билдирилди.
Давлат раҳбарининг, юрт осойишталиги йўлида хизмат қилаётган ҳар бир ватан ҳимоячисига билдирган улкан ишончи, уларга яратилаётган шароит ва имкониятлар албатта фидойилик ва мардлик намоён этишга ундайди.
Ҳосилбекнинг оиласи, фарзандлари, ва ота-онаси ҳамиша давлатимиз эътиборида бўлиб, ижтимоий муҳофазаси таъминлаб борилади.
Қашқадарё вилояти Ғузор туманидаги 62-мактабда эса Ҳосилбек учун ёдгорлик барпо этилади ва у ўқувчилар қалбида ватанга ва бурчга садоқат рамзига айланади.
Шахсан давлат раҳбарининг эътибори билан, Ҳосилбек Эшназаров юксак унвон “Жасорат” медали билан мукофотланди.
Тадбирда Ички ишлар вазири томонидан ушбу медал Ҳосилбекнинг отасига топширилди. Шу билан бирга Президент совғаси сифатида Эшназаровлар оиласига уч хонали хонадон тақдим этилди.
Ўша машъум тунда кичик сержант Эшназаров билан бир йўналишда хизмат олиб борган сафдоши воқеани хотирлар экан, агар ходим жиноятчини ўз вужуди билан тўхтатиб қолмаганда ҳодиса ўта аянчли оқибатда якунланиши мумкинлигини айтиб ўтди.
Таъкидлаш жоизки, жамоатчиликни оёққа турғизган ҳолатда бутун халқ бирлашиб ички ишлар ходимлари томонида турди. Ҳа, халқ ўз қаҳрамонларини яхши танийди.
Мустақиллик йилларида 118 нафар ички ишлар ходимлари хизмат вазифасини бажариш чоғида ҳалок бўлди. Ҳосилбек Эшназаровнинг исми ҳам ана шундай мард ўғлонлар сафида зарҳал ҳарфлар билан ёзилди.
Муқаддас қасамёдига садоқат кўрсатган ЙПХ инспектори қалбимизда мангу яшайди.