ИИВ раҳбарияти томонидан Чилонзор туманида хавфсиз муҳитни таъминлаш ишларига амалий ёрдам кўрсатилди
2026-03-05 10:00:00 / Янгиликлар
Пойтахт туманларида жамоат хавфсизлигини таъминлаш, ҳуқуқбузарликларнинг барвақт олдини олиш ҳамда профилактик ишлар самарадорлигини ошириш мақсадида тизимли чора-тадбирлар амалга оширилмоқда.
Шу муносабат билан Ўзбекистон Республикаси Ички ишлар вазирлиги Жамоат хавфсизлиги департаменти Ҳуқуқбузарликлар профилактикаси хизмати бошлиғи, полковник Ш. Уралов Тошкент шаҳри Чилонзор тумани маҳаллаларида бўлиб, ҳудудларда хавфсиз муҳитни таъминлаш ва профилактика ишларини ташкил этиш ҳолатини ўрганди.
Ўрганишлар давомида профилактика инспекторларининг хизмат фаолияти, аҳоли билан манзилли ишлаш тизими, жиноятчилик ва ҳуқуқбузарликларнинг олдини олишга қаратилган чора-тадбирлар таҳлил қилинди.
Шунингдек, ҳудудлардаги криминоген вазият, профилактик тадбирларнинг самарадорлиги ҳамда маҳалла институти билан ҳамкорлик масалалари атрофлича кўриб чиқилди.
Амалий ўрганишлар жараёнида айрим йўналишларда учраётган камчиликларни бартараф этиш, профилактика ишларини янада кучайтириш ва хизмат фаолияти самарадорлигини ошириш юзасидан масъул ходимларга тегишли кўрсатма ва амалий тавсиялар берилди.
Шу билан бирга, маҳаллаларда тинчлик ва осойишталикни таъминлаш, жамоат хавфсизлигини мустаҳкамлаш ҳамда аҳоли билан ҳамкорликда профилактик тадбирларни янада кучайтириш борасида вазифалар белгилаб берилди.
Ҳудудларда хавфсиз муҳитни таъминлаш, ҳуқуқбузарлик ва жиноятчиликнинг олдини олишга қаратилган ишлар изчил давом эттирилмоқда.
ИИВ ЖХД Ахборот хизмати