Бухоро вилояти ИИБ раҳбариятининг Олот туманида сайёр қабули ўтказилиб, фуқароларнинг муаммолари жойида ҳал этилди
2026-03-05 10:00:00 / Янгиликлар
Жорий йилнинг 4 март куни Бухоро вилояти Олот тумани «Бўрибек-Чандир» маҳалласи биносида вилоят Ички ишлар бошқармаси бошлиғи иштирокида фуқароларнинг мурожаатлари ва кундалик муаммоларини ҳал этишга қаратилган оммавий сайёр қабул бўлиб ўтди.
Тадбирда фуқаролар иштирок этиб, ўзларини қийнаётган турли ижтимоий ва ҳуқуқий масалалар юзасидан бевосита бошқарма бошлиғига 15 дан ортиқ мурожаат йўллашди.
Сайёр қабул давомида кўтарилган асосий масалалар қаторида маиший, иқтисодий ҳамда тергов, суд ва ҳуқуқ соҳасига оид масалалар, фуқароларни ишга жойлаштириш ва бандлигини таъминлаш, пробация ҳисобида турган шахсларни тайинланган жазодан муддатидан олдин озод қилиш, тадбиркорлик ва ўз ишини бошлаш учун ер ажратиш ҳамда тижорат банкларидан кредит олиш, талабаларнинг тўлов-контракт пулларини тўлашда амалий ёрдам кўрсатиш, иш берувчилар томонидан вақтида тўланмай келинаётган иш ҳақларини ундириб бериш ўрин олди.
Мурожаатларнинг аксарияти жойида ижобий ҳал этилган бўлса, қўшимча ўрганиш талаб этиладиган масалалар бўйича тегишли соҳавий хизмат раҳбарларига аниқ топшириқлар берилиб, ижроси назоратга олинди.
Қабул давомида кўрсатилган амалий ёрдам ва муаммоларнинг тезкорлик билан ҳал этилганлиги учун фуқаролар томонидан ички ишлар органлари ходимларига миннатдорчилик билдирилди.
Шунингдек, сайёр қабул доирасида маҳалла еттилиги ҳамда ҳудуддаги корхона ва ташкилот раҳбарлари иштирокида алоҳида йиғилиш ўтказилди.
Унда Ўзбекистон Республикаси Президентининг ПҚ-1-сон қарори ҳамда пойтахтимизнинг «Чилонзор тажрибаси» асосида амалга оширилиши лозим бўлган устувор вазифалар муҳокама қилиниб, мутасаддиларга тегишли топшириқ ва кўрсатмалар берилди.
Бухоро вилояти ИИБ Ахборот хизмати