Навоийда вилоят ИИБ раҳбарияти Кармана туманида ташкил этилган тезкор-штаб фаолияти билан танишди
2026-03-02 09:00:00 / Янгиликлар
Мамлакатимиз раҳбарининг “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги ПҚ-1-сон ҳамда “2026-йил Республика маҳаллаларида жиноятчиликнинг барвақт профилактикаси самарадорлигини янада ошириш бўйича ташкилий чора-тадбирлар тўғрисида”ги ПҚ-2-сонли қарорлари ижросини таъминлаш мақсадида Навоий вилоятида ҳам қатор самарали ишлар амалга оширилмоқда.
Жиноятларни жиловлаш борасида кўрилаётган чора-тадбирлар билан яқиндан танишиш мақсадида вилоят прокурори ҳамда ИИБ бошлиғи Кармана туманида ташкил этилган тезкор-штабда бўлди.
Ўрганишлар давомида масъуллар маҳаллаларда хавфсиз муҳитни шакллантириш, жиноят ва ҳуқуқбузарликларнинг олдини олиш, профилактик тадбирлар самарадорлигини ошириш, шунингдек, замонавий технологиялар ва видеокузатув тизимларидан фойдаланиш ҳолати билан танишди.
Тезкор-штаб фаолияти орқали келиб тушаётган мурожаатларни кўриб чиқиш, муаммоларга жойида ечим топиш ва масъул ташкилотлар ўртасида ўзаро ҳамкорликни мустаҳкамлаш масалаларига алоҳида эътибор қаратилди.
Бундан ташқари, аҳоли билан мулоқотни кучайтириш ҳамда профилактик ишларни янада фаоллаштириш бўйича тегишли тавсиялар берилди.
Навоий вилояти ИИБ Ахборот хизмати