Қарши шаҳрида «Хавфсиз маҳалла» тамойили асосида жиноятчиликнинг барвақт олдини олиш чоралари кучайтирилмоқда
2026-02-28 14:30:00 / Янгиликлар
Давлатимиз раҳбарининг жорий йил 27 январь кунги видеоселектор йиғилишида берилган топшириқлар ижросини таъминлаш мақсадида Қарши шаҳри ҳудудида «Чилонзор тажрибаси» асосида тизимли ўрганишлар олиб борилмоқда. Шу мақсадда вилоят Ички ишлар бошқармаси бошлиғи Абдувоҳид Исмоилов томонидан Қарши шаҳрида жиноятчиликни барвақт олдини олиш, «Хавфсиз маҳалла» тамойили доирасида амалга оширилаётган ишлар ҳолати атрофлича ўрганилди.
Шаҳар ҳудудидаги бозорлар, кичик маиший хизмат кўрсатиш шохобчалари, савдо мажмуалари, аҳоли гавжум жойлар ҳамда транспорт қатнови юқори бўлган ҳудудларда хавфсизлик чоралари кўздан кечирилди. Ҳудудларни камералаштириш даражаси, белгиланган манзилларда SOS ва тезкор ҳаракатланувчи ташвиш тугмаларининг ўрнатилиши, қўриқлаш пультлари фаолияти ўрганилди.
Ўрганиш жараёнида қўриқлаш хизмати тезкор ҳаракатланувчи ташвиш тугмаси ходимлари билан суҳбатлашилиб, уларнинг воқеа жойига етиб бориш тезкорлиги, махсус автотранспорт воситалари ва замонавий алоқа ҳамда ҳимоя воситалари билан жиҳозланганлиги, кунлик келиб тушаётган мурожаатлар сони, чақирувларга жавоб бериш сифати ва тезкорлик кўрсаткичлари таҳлил қилинди. Шунингдек, профилактик рейдлар самарадорлиги, хизмат ҳудудлари бўйича назорат механизмлари ҳам муҳокама этилди.
Тунги хизматга жалб этилган ходимлар билан ҳам алоҳида суҳбат ўтказилиб, уларнинг хизмат олиб бориш шароити, тунги патруллик йўналишлари, ҳудудларда жамоат тартибини сақлаш борасидаги масъулияти, шахсий хавфсизлик чораларига риоя этилиши ҳамда хизмат интизоми масалалари юзасидан тегишли тавсиялар берилди.
Бундан ташқари, савдо мажмуаларининг қўриқловга олинганлик даражаси, ички ва ташқи ҳудудларда ўрнатилган видеокузатув камералари қамрови, кириш-чиқиш назорати, ёнғин ва фавқулодда ҳолатлар учун хавфсизлик тизимларининг ҳолати ўрганилиб, масъулларга аниқ топшириқлар берилди. Хусусан, камераларнинг «Хавфсиз шаҳар» ягона тизимига интеграцияси, қўриқлаш шартномаларини кенгайтириш, ноқонуний савдо ва тартибсизлик ҳолатларининг олдини олиш бўйича профилактик назоратни кучайтириш зарурлиги таъкидланди.
Ўрганиш якунида аниқланган камчиликларни бартараф этиш, хизмат интизомини янада мустаҳкамлаш, замонавий технологиялардан самарали фойдаланиш ҳамда энг асосийси, аҳоли ишончини янада оширишга қаратилган чора-тадбирлар белгилаб олинди.