Олий Мажлиснинг Бола ҳуқуқлари бўйича вакили ва Ички ишлар вазирлиги ҳузуридаги Жазони ижро этиш департаменти раҳбарияти ўртасида амалий учрашув бўлиб ўтди
2026-02-27 18:00:00 / Янгиликлар
Суҳбат давомида Болалар омбудсмани томонидан бола ўз ихтиёри билан чиқиб кета олмайдиган ёпиқ муассасаларда ўтказилган мониторинг ташрифлари доирасида аниқланган камчиликлар ҳақида билдирилиб, тергов ҳибсхоналари, тарбия колонияларида сақланаётган вояга етмаганлар ҳамда аёллар колонияларидаги вояга етмаган қизлар учун яратилган шароитлар белгиланган минимал стандартларга етарлича мувофиқ эмаслиги, санитария талабларидан оғишлар кузатилгани баён этилиб, мазкур ёпиқ муассасаларда болалар учун барча стандартларни ҳамда таълим учун шарт-шароитларни таъминлаш зарурати мавжуд эканлиги таъкидланди.
Учрашув жараёнида Жазони ижро этиш департаменти раҳбари бугунги кунда жазо муддатини ўтаётган вояга етмаганларни жамиятга қайта интеграция қилинишида кўмак чоралари кўрилаётганлиги ҳақида маълумот бериб, соҳада мавжуд муаммоларни олдини олишда Болалар омбудсмани билан тизимли ҳамкорликни йўлга қўйган ҳолда камчиликларни бартараф этиш зарурлигини билдирди.
Учрашув якунида икки томонлама ўзаро конструктив алоқаларини мустаҳкамлаш ҳамда вояга етмаганларга нисбатан жазо сиёсатини трансформация қилиш йўлида биргаликда ишлашга келишиб олинди.