Китоб – маърифат манбаи” шиори остида “Китоблар ярмаркаси” ташкил этилди
2026-02-27 13:00:00 / Янгиликлар
Ички ишлар органлари тизимида маънавий-маърифий ишлар самарадорлигини янада ошириш, ходимлар ўртасида китобхонлик маданиятини кенг тарғиб қилиш, янги нашрлар ва сифатли таржималарни оммалаштириш мақсадида жорий йил 26 февраль куни Вазирлик марказий аппарати ҳудудида “Китоб – маърифат манбаи” шиори остида “Китоблар ярмаркаси” ташкил этилди.
Мазкур тадбирда энг сара хорижий ва ўзбек адабиётлари, жумладан, бадиий, илмий-оммабоп, ҳуқуқий ва маънавий-маърифий йўналишдаги китоблар тақдимоти ўтказилди.
Ярмарка иштирокчилари ўзларининг хизмат фаолияти ва шахсий қизиқишларидан келиб чиқиб, зарур адабиётларни бевосита иш жойида харид қилиш имконига эга бўлдилар. Бу эса ходимлар учун вақт тежамкорлиги ва қулайлик яратиб, китобга бўлган қизиқишни янада оширишга хизмат қилди.
Янги давр шиддати шароитида ёш авлоднинг маънавий-интеллектуал салоҳияти, онгу тафаккури ва дунёқарашини юксалтириш, Ватан ва халққа муҳаббат ва садоқат руҳида тарбиялашда китобхонлик маданияти алоҳида аҳамият касб этади.
Айниқса, ички ишлар органлари ходимлари учун китоб мутолааси касбий маҳоратини ошириш, ҳуқуқий билимларини мустаҳкамлаш, таҳлилий фикрлаш қобилиятини ривожлантириш ҳамда юксак маънавиятли шахс сифатида шаклланишида муҳим омил ҳисобланади.
Шу маънода, “Китоб – маърифат манбаи” шиори остида ўтказилган мазкур ярмарка нафақат китоб савдоси, балки маънавиятни юксалтириш, билим ва тафаккурни бойитишга қаратилган амалий ташаббус сифатида алоҳида аҳамиятга эга бўлди.