Ўзбекистон Республикаси Ички ишлар вазирлиги

Ўзбекистон Республикаси Ички ишлар вазирлиги “Динамо” жисмоний тарбия-спорт жамияти Кенгашининг тасдиқланган тақвим режасига мувофиқ, ХХХIV-спартакиада мусобақалари юқори савияда ва пухта ташкилий ёндашув асосида ташкил этилди. Мазкур нуфузли спорт тадбирида жами 15 та жамоа иштирок этиб, турли йўналишлар бўйича ўзаро беллашдилар.

Ички ишлар вазирлиги терма жамоаси ушбу мусобақада алоҳида тайёргарлик ва юқори масъулият билан иштирок этди. Жамоа спортнинг 9 та тури — волейбол, стол тенниси, енгил атлетика, хизмат кўп кураши, футбол, ўқ отиш, шахмат, қўл жанги ҳамда самбо кураши бўйича беллашувларда майдонга тушиб, ўзининг жисмоний тайёргарлиги, жамоавий ҳамжиҳатлиги ва ғалабага бўлган интилишини намоён этди. Сўнгги натижаларга кура Ички ишлар вазирлиги жамоаси спортнинг Қўл жанги тури бўйича 2-ўринни, енгил атлетика, хизмат кўп кураши, волейбол, ўқ отиш, шахмат ва самбо кураши йўналишларида эса 3-ўринларни эгаллади ҳамда барқарор натижа қайд этди. Мусобақа якунига кўра, умумжамоа ҳисобида Ички ишлар вазирлиги терма жамоаси фахрли 3-ўринни эгаллади. Ушбу натижа ходимлар ўртасида соғлом турмуш тарзини тарғиб қилиш, жисмоний тайёргарликни мустаҳкамлаш ҳамда хизмат интизомини ошириш борасида олиб борилаётган тизимли ишлар самараси эканини яна бир бор исботидир.