Ички ишлар вазирлиги Жамоат хавфсизлиги департаменти раҳбариятининг шахсий қабули ўтказилди
2026-02-21 09:00:00 / Янгиликлар
Фуқаролар билан тўғридан-тўғри мулоқот алоҳида инсон муаммосини муддатларни чўзмасдан ва бюрократик сансалорликка йўл қўймасдан зудлик билан ҳал этиш имконини беради.
Бу эса жамият сифатининг умумий равишда ошишига ва давлат органларига бўлган ишончнинг мустаҳкамланишига бевосита таъсир кўрсатади.
Шунингдек, фуқароларнинг мурожаатлари ички ишлар органлари фаолиятидаги камчилик ва нуқсонларни аниқлашга хизмат қилади.
Шу боис, республика Ички ишлар вазирлиги раҳбарияти томонидан фуқароларнинг шахсий қабуллари расмий тартиб-таомил сифатида эмас, балки инсон муаммосига чуқур кириб бориш ва унинг ҳуқуқлари, эркинликлари ҳамда қонуний манфаатларини ҳимоя қилиш учун барча чораларни кўришга тайёр бўлган «эшитувчи давлат» тамойилининг амалий ифодаси сифатида қаралади.
Жумладан, шахсий қабул давомида Ўзбекистон ички ишлар вазирининг биринчи ўринбосари — Жамоат хавфсизлиги департаменти бошлиғи, генерал-майор Р. М. Джураев Тошкент шаҳри ва Тошкент вилоятидан келган 75 нафар фуқаронинг терговга қадар текширув, суриштирув ва дастлабки тергов, жазони ижро этиш, миграция, ҳуқуқбузарликлар профилактикаси хизмати фаолияти ҳамда бошқа масалаларга оид мурожаатларини эшитди.
Кўриб чиқиш натижаларига кўра, 15 та мурожаат жойида ижобий ҳал этилди, 5 та мурожаат бўйича ариза муаллифларига малакали ҳуқуқий маслаҳат ва тушунтиришлар берилди, қўшимча вақт талаб этилган 40 нафар фуқаронинг мурожаатлари эса масъулларга тегишли топшириқлар берган ҳолда ижрога йўналтирилиб, қонуний ҳал этилиши назоратга олинди.
ИИВ ЖХД Ахборот хизмати