Тошкент шаҳар Чилонзор туманида «Хавфсиз шаҳар» концепцияси доирасида камералаштириш ишлари босқичма-босқич амалга оширилмоқда
2026-02-21 09:00:00 / Янгиликлар
ИИВ «Хавфсиз шаҳар» тизимларини ривожлантириш маркази мутахассислари ҳамда Чилонзор тумани ИИБ ходимлари томонидан туман ҳудудидаги маҳаллалар, савдо ва хизмат кўрсатиш объектлари, аҳоли гавжум жойлар ҳамда ички кўчаларда интеллектуал видеокузатув камераларини ўрнатиш юзасидан жойларга чиқиб ўрганишлар олиб борилмоқда.
Жараёнда қурилмаларни мақбул жойлаштириш нуқталари аниқланиб, техник имкониятлар, электр таъминоти ва интернет тармоғига уланиш масалалари батафсил таҳлил қилинмоқда.
Шунингдек, замонавий камералар орқали реал вақт режимида кузатувни йўлга қўйиш, маълумотларни ягона марказлашган тизимга интеграция қилиш ҳамда тезкор хизматлар билан ўзаро ҳамкорликни кучайтириш чоралари кўрилмоқда.
Мазкур тадбирлар жамоат хавфсизлигини таъминлаш, ҳуқуқбузарлик ва жиноятларнинг барвақт олдини олиш, содир этилган ҳолатларни тезкор фош этиш ҳамда ҳудудларда барқарор ва хавфсиз муҳитни шакллантиришга қаратилган.
Ички ишлар вазирлигининг «Хавфсиз шаҳар» тизимларини ривожлантириш маркази томонидан бу борадаги ишлар изчил давом эттирилиб, замонавий ахборот-коммуникация технологияларини кенг жорий этиш орқали аҳоли осойишталигини таъминлаш устувор вазифа сифатида белгиланган.
Ички ишлар вазирлигининг «Хавфсиз шаҳар» тизимларини ривожлантириш маркази