Ўзбекистон Республикаси Ички ишлар вазирлиги

Бугун мамлакатимиз ички ишлар органлари тизимида фуқароларнинг ариза ва шикоятлари билан ишлаш сифат жиҳатидан янги босқичга кўтарилди. Хусусан, эндиликда асосий эътибор муаммонинг амалий ечимига ва ходимларнинг хатти-ҳаракатлари устидан қатъий назорат ўрнатишга қаратилмоқда.

Фуқаро ва вазирлик ўртасидаги ишонч кўприги

Мурожаатлар билан ишлаш бўлимининг асосий вазифаси — аризаларни қабул қилиб олиш билан чекланиб қолмасдан, ҳар бир ҳолат бўйича холис ўрганиш ўтказилишини таъминлашдир. Чунки адолатсизликка, сансалорликка ёки жойлардаги ходимларнинг ноўрин хатти-ҳаракатларига дуч келган фуқаролар айнан шу бўлимга умид билан юзланишади.

Ўтган йил давомида ИИВ ЖХД ҲПХ мурожаатлар билан ишлаш бўлими томонидан самарали ишлар амалга оширилди. Таҳлиллар шуни кўрсатмоқдаки, шикоятлар билан ишлаш жараёни сондан сифатга ўтмоқда. Энди ҳар бир мурожаат тизим ичидаги қонунбузарликларни аниқлаш ва хизмат текшируви ўтказиш учун муҳим асос бўлиб хизмат қилмоқда.

Тизимли хатолар устида ишлаш

Қонун талабларига беписандлик билан қилинаётган ҳолатларга алоҳида эътибор қаратилмоқда. Масалан, Хоразм ва Фарғона вилояти ҳамда Тошкент шаҳрида жиноят иши қўзғатишни асоссиз рад этиш ҳолатлари аниқланган. Бўлим ходимлари бундай қонун бузилишларини ўз вақтида аниқлаб, материалларни қайта кўриб чиқиш учун тергов органларига қайтараётир.

Айниқса, Андижон вилоятидаги бир ҳолат мустақил назорат нақадар муҳимлигини кўрсатди. Гап шундаки, фуқаронинг ходим устидан қилган шикоятини ўрганиш айнан ўша ходимнинг ўзига топширилган. Фақатгина вазирликнинг қатъий аралашуви ва материалларнинг синчиклаб ўрганилиши натижасида адолат тикланди. Бундай ҳолатлар бутун тизим учун сабоқ бўлиши керак. Зеро, мурожаатларга нисбатан бефарқлик ва «таниш-билишчилик»ка асло йўл қўйиб бўлмайди.

Рақамли мулоқот: Вазир билан юзма-юз

Жорий йилнинг 26 январидан бошлаб аҳоли билан мулоқот қилишнинг мутлақо янги ва замонавий шакли йўлга қўйилди. Ички ишлар вазирининг шахсий қабуллари энди бюрократик тўсиқларсиз, яъни Тошкент шаҳри аҳолиси учун бевосита очиқ мулоқот тарзида, ҳудудлар ва Қорақалпоғистон Республикаси учун эса замонавий видеоконференсалоқа тизими орқали ўтказилмоқда.

Эндиликда ўз муаммосини раҳбариятга етказиш учун юзлаб километр йўл босиб, пойтахтга келишга ҳожат қолмади. Натижалар эса кўзга кўринарли: тизимга оид муаммоларнинг қарийб ярми жойида ҳал этилмоқда. Хусусан, мулкий низолар, йўл ҳаракати хавфсизлиги ва кадрлар билан боғлиқ масалалар ўзининг қонуний ечимини топмоқда.

Адолат – эришилган натижада

Тезкор аралашувнинг ёрқин мисоли сифатида Бектемир туманида яшовчи фуқаронинг тақдирини келтириш мумкин. У фирибгарлик қурбони бўлиб, уйи сохта ҳужжатлар орқали бошқа шахслар номига ўтказиб юборилганди. Фақатгина раҳбарият назорати ва соҳавий хизматларнинг изчил текширувидан сўнг иш олдинга силжиди ва суд адолатли қарор чиқарди.

Бу каби ишлар барча ҳудудий бошқармаларда изчил давом эттирилмоқда. Қабул қилинган минглаб фуқаролар ва ижобий ҳал этилган юзлаб масалалар бугун ҳар бир инсоннинг овози эшитилаётганидан далолатдир.

Поклик ва қонунийлик

ИИВ ЖХД ҲПХ мурожаатлар билан ишлаш бўлими шунчаки ариза қабул қилувчи маскан эмас, балки тизимни нопок ходимлардан тозалаш воситасидир. Бунда асосийси ҳисобот учун тўлдирилган йиғма жилдлар сони эмас, балки адолатнинг қарор топиши муҳимдир.

Азиза Боходирова, майор. «Постда»