Андижон вилояти Асака туманида содир этилган жиноят юзасидан сабаб ва шарт-шароитлар кенг жамоатчилик билан биргаликда танқидий муҳокама қилинди
2026-02-20 11:30:00 / Янгиликлар
Асака туманининг Қўнғирот маҳалласида содир этилган оила турмуш доирасидаги оғир турдаги жиноятнинг келиб чиқиш сабаблари, жамиятдаги ижтимоий-руҳий муҳитга таъсири ҳамда профилактик чора-тадбирларнинг самарадорлигини ошириш масалалари бўйича Андижон вилояти прокурори Муродилло Абдуҳакимов ҳамда Ички ишлар бошқармаси бошлиғи Санжар Джабаровлар раислигида муҳокама йиғилиши ўтказилди.
Кенг жамоатчилик иштирокида бўлиб ўтган муҳокамада жиноят содир этилишига сабаб бўлган омиллар, жамиятдаги беэътиборлик, профилактик тадбирлар самарасизлиги ва муайян мутасадди органлар фаолиятидаги камчиликлар аниқ фактлар асосида танқидий кўриб чиқилди.
Муҳокама давомида жиноятнинг олдини олиш имкони бўлгани, лекин масалага “маҳалла еттилиги” аъзолари ва бошқа масъуллар томонидан таъсирчан чоралар кўрилмаганлиги кескин танқид остига олинди.
Шунингдек, ўтказилган муҳокамада бугунги кунда кенг тус олаётган кибержиноятчилик ва унинг турлари хусусида ҳам атрофлича сўз юритилди. Хусусан, банк карталари билан боғлиқ ўғрилик ва фирибгарлик жиноятларининг олдини олиш мақсадида “Телеграм” мессенжери орқали тарқатилаётган “.apk” вирусли ҳаволаларни аниқлаш ва ўчиришга хизмат қилувчи “@cybershielduz_bot” ботинини ҳар бир маҳаллада, “фуқаробай” тарзда ўрнатиш чораларини кўриш зарурлиги таъкидланди.
Шу билан биргаликда, Ўзбекистон Республикаси Президентининг 2025 йил 3 ноябрда қабул қилинган “Аҳоли саломатлиги ва миллат генофондини гиёҳвандлик ва наркожиноятлардан самарали ҳимоя қилиш бўйича комплекс чора-тадбирлар тўғрисида”ги ПФ–207-сонли Фармонида гиёҳвандликнинг олдини олиш борасида масъул ташкилотларга аниқ вазифалар белгилаб берилгани алоҳида таъкидланиб, ёшлар орасида бу иллатнинг олдини олиш муҳимлиги ҳақида фикр мулоҳазалар билдирилди.
Тадбир якунида барча мутасаддиларга жиноят содир этилишини олдини олишга қаратилган аниқ топшириқ ва вазифалар белгилаб берилди.
Андижон вилояти ИИБ Ахборот хизмати