Наманган вилояти ИИБ ишчи гуруҳининг навбатдаги ўрганиш ишлари Чортоқ туманида давом эттирилди
2026-02-20 06:25:00 / Янгиликлар
Ўзбекистон Республикаси Президентининг тегишли қарор ва топшириқлари ижросини таъминлаш, ҳудудларда жиноятчилик ва ҳуқуқбузарликларнинг барвақт олдини олиш, жамоат хавфсизлигини мустаҳкамлаш ҳамда аҳоли осойишталигини таъминлаш мақсадида Наманган вилоятининг барча шаҳар ва туманларида комплекс ҳамда тизимли чора-тадбирлар амалга оширилмоқда. Мазкур жараёнлар доирасида бошқарма раҳбарияти томонидан ҳудудлардаги криминоген вазият мунтазам ўрганилиб, аниқланаётган муаммоларни бартараф этиш юзасидан манзилли ва амалий ёрдам кўрсатиб келинмоқда.
Хусусан, бошқарма бошлиғи раҳбарлигидаги ишчи гуруҳ Чортоқ туманида бўлиб, туман ҳокими, прокурори ҳамда бошқа мутасадди раҳбарлар иштирокида “Балиқли кўл”, “Оқ терак”, “Қорамурут” ва “Бешкапа” маҳаллалари фаолияти чуқур таҳлил қилинди.
Ўрганишлар давомида оила-турмуш доирасида содир этилган қотиллик, тан жароҳати етказиш ҳамда маиший зўравонлик билан боғлиқ жиноятларнинг келиб чиқиш сабаблари ва омиллари атрофлича муҳокама қилиниб, ушбу турдаги жиноятларнинг барвақт олдини олиш, профилактик тадбирлар самарадорлигини ошириш ҳамда манзилли чора-тадбирларни кучайтириш бўйича аниқ вазифалар белгилаб берилди.
Шунингдек, Чортоқ тумани ИИБ ходимлари томонидан ҳудудда жиноятчиликнинг барвақт олдини олиш, хусусан, Тошкент шаҳрининг Чилонзор тумани тажрибаси асосида манзилли ишларни ташкил этиш бўйича тайёрланган тақдимот билан танишилди. Ҳар бир йўналиш кесимида устувор вазифалар аниқланиб, масъул ходимлар зиммасига тегишли топшириқлар юклатилди ҳамда уларнинг ижроси қатъий назоратга олинди.
Наманган вилояти ИИБ Ахборот хизмати