Андижон вилояти ИИБ раҳбарияти Избоскан туманида “Жасорат синфи” ўқувчилари билан учрашди
2026-02-19 14:50:00 / Янгиликлар
Тадбир доирасида Андижон вилояти ИИБ бошлиғи ўқувчилар билан очиқ мулоқот олиб бориб, жасорат синфларининг мазмун-моҳияти, уларнинг ёш авлодни интизомли, билимли ва Ватанга садоқатли этиб тарбиялашдаги аҳамиятига алоҳида тўхталиб ўтди.
Учрашув давомида ўқувчилар томонидан билдирилган фикр-мулоҳазалар ва таклифлар тингланиб, уларнинг қизиқишлари қўллаб-қувватланди.
Шунингдек, мазкур таълим муассасасида барпо этилаётган замонавий гимнастика шаҳарчаси қурилиш жараёнлари билан яқиндан танишилди. Хусусан, югуриш ва тўсиқлар йўлаклари, жисмоний тайёргарликни оширишга хизмат қилувчи иншоотлар ҳамда ўқ отиш тирининг барпо этилиши ёшларнинг жисмоний ва маънавий камолотига хизмат қилиши таъкидланди.
Бундан ташқари, жасорат синфи ўқувчиларининг дарс машғулотлари кузатилиб, таълим жараёнига замонавий ёндашувларни жорий этиш, ватанпарварлик ғояларини янада мустаҳкамлаш ва амалий кўникмаларни ошириш юзасидан тегишли тавсиялар берилди.
Мазкур учрашув ёшлар ўртасида ҳуқуқий маданиятни юксалтириш, уларни она-Ватанга муҳаббат ва садоқат руҳида тарбиялаш борасидаги ишларга янада кучли туртки бериши билан аҳамиятли бўлди.
Андижон вилояти ИИБ Ахборот хизмати