Сирдарё вилояти ИИБ раҳбарияти томонидан Сардоба туманида криминоген вазият ўрганилди
2026-02-19 12:20:00 / Янгиликлар
Ташриф аввалида туман Ички ишлар бўлими биносида бўлиб, жиноятчилик ва ҳуқуқбузарликларнинг олдини олиш, профилактика ишларини кучайтириш, аҳоли мурожаатлари билан ишлаш ҳамда хизмат интизомини таъминлаш борасида амалга оширилаётган чора-тадбирлар билан яқиндан танишди. Шунингдек, шахсий таркиб билан мулоқот ўтказилиб, хизмат самарадорлигини ошириш, профилактик ишларни манзилли ташкил этиш ва “Хавфсиз маҳалла” тамойили асосида ишлаш бўйича аниқ вазифалар белгилаб берилди.
Бошқарма бошлиғи Чилонзор тажрибаси асосида ташкил этилган штаб фаолиятини ҳам кўздан кечирди. Ушбу штаб орқали ҳудуддаги криминоген вазиятни таҳлил қилиш, муаммоли нуқталарни аниқлаш ва тезкор чора кўриш механизми йўлга қўйилгани алоҳида таъкидланди. Таҳлиллар асосида жиноятчиликка мойил шахслар билан индивидуал ишлаш, профилактик ҳисобда турувчи фуқаролар назоратини кучайтириш ҳамда маҳаллаларда хавфсиз муҳит яратиш бўйича тавсиялар берилди.
Шундан сўнг бошқарма бошлиғи Сардоба туманининг “Отаюрт” маҳалласига ташриф буюриб, маҳаллада амалга оширилаётган профилактик ишлар билан танишди. Маҳалла фаоллари, профилактика инспектори ва ҳудудга бириктирилган масъул ходимлар билан учрашув ўтказилиб, жиноятчиликнинг барвақт олдини олиш, аҳоли айниқса ёшлар ва хотин-қизлар билан манзилли ишлаш, муаммоли оилалар ҳолатини ўрганиш масалалари муҳокама қилинди.
Ташриф давомида бошқарма бошлиғи профилактика инспекторининг хизмат уйига ҳам ташриф буюриб, у ерда яратилган шарт-шароитлар билан яқиндан танишди. Профилактика инспекторининг яшаш хизмат уйи ҳолати, оила аъзолари учун яратилган қулайликлар, маиший шароитлар ҳам кўздан кечирилди.
Ташриф якунида бошқарма бошлиғи томонидан ҳудудда жиноятчилик ва ҳуқуқбузарликларнинг барвақт олдини олиш, аҳоли билан манзилли ишлаш ҳамда профилактика тадбирларини тизимли ташкил этиш устувор вазифа экани алоҳида таъкидланди. Ҳар бир маҳаллада криминоген вазиятни чуқур таҳлил қилиш, “оғир” тоифадаги фуқаролар, муаммоли оилалар ва ёшлар билан индивидуал ишлашни кучайтириш бўйича аниқ кўрсатмалар берилди.
Шунингдек, ички ишлар органлари ходимларидан фуқаролар билан очиқ ва самимий мулоқотни йўлга қўйиш, мурожаатларга тезкор ва адолатли муносабат билдириш, хизмат интизоми ва масъулиятни янада ошириш талаб этилди.
Қайд этилганидек, тинчлик ва хавфсизликни таъминлаш — энг аввало, аҳоли ишончига сазовор бўлиш орқали амалга оширилади. Шу боис, ҳар бир ходим ўз хизмат вазифасига виждонан ёндашиб, халқ тинчлиги ва фаровонлиги йўлида сидқидилдан хизмат қилиши зарурлиги таъкидланди.
Сирдарё вилояти ИИБ Ахборот хизмати