Қашқадарё вилояти Чироқчи туманида жорий йил давомида содир этилган жиноятлар муҳокамасига бағишланган йиғилиш бўлиб ўтди
2026-02-18 09:00:00 / Янгиликлар
Унда Қашқадарё вилояти Ички ишлар бошқармаси бошлиғи Абдувоҳид Исмоилов, туман ИИБ раҳбарияти, профилактика инспекторлари, маҳалла фаоллари ҳамда пробация ҳисобида турувчи шахслар иштирок этишди.
Муҳокама давомида туманда қайд этилган жиноят турлари, уларнинг асосий сабаблари, ижтимоий-маиший омиллари ҳамда такрор жиноятчилик ҳолатлари юзасидан таҳлиллар қилинди.
Айниқса, ёшлар ўртасидаги ҳуқуқбузарликлар, оилавий низолар, меҳнатсизлик оқибатида содир бўлаётган жиноятларга алоҳида эътибор қаратилди.
Йиғилишда профилактика инспекторларининг маҳаллаларда олиб бораётган ишлари танқидий кўз билан баҳоланиб, ҳар бир инспекторга ўз ҳудудидаги хавфли гуруҳдаги фуқаролар билан якка тартибда ишлаш, пробация ҳисобида турувчи шахсларни жамиятга қайта мослаштириш, уларнинг бандлигини таъминлаш бўйича аниқ вазифалар юклатилди.
Пробация назоратидаги шахслар билан очиқ мулоқот ўтказилиб, уларга қонун талаблари, ҳуқуқий мажбуриятлари ҳамда жиноят содир этишнинг салбий оқибатлари тушунтирилди.
Шу билан бирга, уларни ижтимоий қўллаб-қувватлаш, касбга йўналтириш ва доимий иш билан таъминлаш масалалари ҳам муҳокама марказида бўлди.
Якунда масъул идораларга жиноятчиликка қарши профилактик тадбирларни кучайтириш, маҳаллаларда аҳоли иштирокини ошириш ва ҳар бир ҳолатга индивидуал ёндашувни таъминлаш юзасидан тегишли кўрсатмалар берилди.
Бу эса туманда жиноятчиликни барвақт олдини олиш ва хавфсиз муҳитни шакллантиришга хизмат қилиши билан аҳамиятлидир.
Қашқадарё вилояти ИИБ Ахборот хизмати