Андижон вилояти ИИБ раҳбарияти томонидан Андижон шаҳрида тунги вақтларда хавфсиз муҳит яратиш бўйича амалга оширилаётган ишлар ўрганилди
2026-02-18 09:00:00 / Янгиликлар
Андижон вилояти ИИБ бошлиғи томонидан Андижон шаҳрида “Чилонзор тажрибаси” асосида жамоат хавфсизлигини таъминлаш борасида амалга оширилаётган ишлар бўйича ўрганишлар олиб борилди.
Хусусан, Андижон шаҳри бўйича ИИО ФМБда доимий фаолият юритаётган тезкор штаб фаолияти, маҳаллалар кесимидаги муаммолар ва уларни бартараф этиш юзасидан бириктирилган масъуллар томонидан олиб борилаётган чора-тадбирлар муҳокама қилинди. Мазкур йўналишдаги ишларни янада кучайтириш бўйича вазифалар белгилаб берилди.
Шунингдек, Бунёдкор маҳалласида жойлашган 42-сонли таянч пунктида хизмат олиб бораётган ходимларнинг амалга оширилаётган ишлари ўрганилди. Улар билан маҳаллада хавфсиз муҳитни яратиш, жиноятчилик ва ҳуқуқбузарликларни барвақт олдини олиш борасидаги ишларни янада кучайтириш юзасидан тушунтириш ишлари олиб борилди.
Бундан ташқари, савдо, хизмат кўрсатиш ва ижтимоий соҳа объектларида Қўриқлаш хизмати томонидан ўрнатилган сигнализация ва қўриқлов воситаларининг техник ҳолати ўрганилиб, тадбиркорларга қўриқлаш тизимига уланишнинг аҳамияти тушунтирилди.
Шу билан бирга, жиноят содир этилиши эҳтимоли юқори бўлган ҳудудларда барвақт профилактик чораларини кучайтириш мақсадида рақамлаштириш жараёнларини жадаллаштириш вазифалари белгилаб берилди.
Андижон вилояти ИИБ Ахборот хизмати