Қорақалпоғистон Республикаси Нукус шаҳрида аралаш жанг санъати ривожига бағишланган учрашув ўтказилди
2026-02-17 00:20:00 / Янгиликлар
Ўзбекистон Республикаси Ички ишлар вазирлиги Аралаш жанг санъати ассоциацияси раиси ўринбосари подполковник Анваров Шухрат Исмагилович ҳамда Қорақалпоғистон Республикаси Ички ишлар вазирининг биринчи ўринбосари полковник Жасурбек Атаев томонидан Нукус шаҳрида спортчилар ва тренерлар билан учрашув ташкил этилди.
Мазкур учрашувдан кўзланган асосий мақсад аралаш жанг санъати спортини янада оммалаштириш, унинг моддий-техник базасини мустаҳкамлаш, шунингдек ёш авлодни спортга кенг жалб этиш орқали соғлом турмуш тарзини тарғиб қилишдан иборат бўлди.
Тадбир давомида сўзга чиққан масъул раҳбарлар аралаш жанг санъатининг ёшлар тарбиясидаги аҳамияти, спорт орқали интизом, матонат ва ватанпарварлик фазилатларини шакллантириш борасида ўз фикр-мулоҳазаларини билдирдилар. Шунингдек, бугунги кунда мазкур спорт турини ҳудудларда янада ривожлантириш, иқтидорли спортчиларни аниқлаш ва қўллаб-қувватлаш, улар учун муносиб шарт-шароитлар яратиш юзасидан аниқ вазифалар белгилаб берилди.
Учрашув давомида спортчи ва мураббийларнинг фикр ва таклифлари тингланди, уларни қизиқтирган саволларга жавоблар берилди. Мутасаддилар томонидан келгусида ўқув-машғулот жараёнларини янада такомиллаштириш, мусобақалар сонини ошириш ҳамда ёшлар ўртасида спортни кенг тарғиб этиш борасида тегишли тавсиялар берилди.
Тадбир якунида бир қатор фаол ва ютуқларга эришган спортчилар ҳамда уларнинг устоз-мураббийларига ташаккурномалар топширилди. Шу билан бирга, уларнинг келгуси фаолиятида янада юксак натижаларга эришишлари учун омад ва муваффақиятлар тилаб қолинди.
Мазкур учрашув аралаш жанг санъати спортини янги босқичга олиб чиқиш, ёшлар ўртасида соғлом турмуш тарзини қарор топтириш ва спортнинг нуфузини янада оширишга хизмат қилиши таъкидланди.
Қорақалпоғистон Республикаси ИИВ Ахборот хизмати