«Ёшлар орасида гиёҳвандлик воситалари ва психотроп моддалар тарқалишининг олдини олиш» тадбири доирасида тарғибот ишлари амалга оширилмоқда
2026-02-14 19:10:00 / Янгиликлар
Ўзбекистон Республикаси Ички ишлар вазирининг фармойишига мувофиқ, 2026 йил 1 февралдан 1 мартга қадар Республика ҳудудида «Ёшлар орасида гиёҳвандлик воситалари ва психотроп моддалар тарқалишининг олдини олиш» комплекс тезкор-профилактик тадбири амалга оширилмоқда.
Фармойиш ижросини таъминлаш доирасида Ўзбекистон Республикаси Ички ишлар вазирлиги Тезкор-қидирув департаменти раҳбарияти ҳамда бошқа мутасадди ташкилотлар масъул ходимлари билан ҳамкорликда Тошкент Кимё халқаро университетида ёшлар ўртасида кенг қамровли тарғибот учрашуви ташкил этилди.
Учрашув давомида талаба-ёшларга гиёҳвандлик воситалари ва психотроп моддаларнинг инсон саломатлиги, онг ва тафаккурига, шунингдек, миллат генофондига етказадиган оғир ва қайтариб бўлмас оқибатлари ҳақида атрофлича маълумот берилди. Наркожиноятларга аралашишнинг ҳуқуқий жавобгарлиги, ёшларнинг бузғунчи оқим ва ноқонуний тармоқларга жалб этилиш хавфи, шунингдек, «закладчиклик» каби жиноий фаолиятларнинг асл моҳияти аниқ мисоллар асосида тушунтирилди.
Тадбир якунида ёшларга ҳуқуқий онг ва мафкуравий иммунитетни мустаҳкамлаш, соғлом турмуш тарзини тарғиб қилиш, гиёҳвандликка қарши муросасиз муносабатни шакллантириш устувор вазифа экани алоҳида таъкидланди.
Мазкур комплекс тадбир доирасида жойларда тарғибот-ташвиқот ишлари, профилактик суҳбатлар ҳамда аниқланган ҳуқуқбузарлик ҳолатлари юзасидан қатъий чоралар кўриш ишлари изчил давом эттирилмоқда.
ИИВ Тезкор-қидирув департаменти