Ўзбекистон Республикаси Ички ишлар вазирлиги

Ўзбекистон Республикаси Президентининг 2026 йил 5 январдаги ПҚ-1 ва ПҚ-2-сонли қарорлари ҳамда соҳани такомиллаштиришга доир ПҚ–111 ва ПҚ–253-сонли қарорларида белгиланган вазифалар ижросини таъминлаш, шунингдек, Бухоро вилоятида жамоат хавфсизлигини таъминлаш борасидаги ишларни кўздан кечириш мақсадида Ўзбекистон Республикаси Ички ишлар вазири ўринбосари, полковник Диёрбек Нематжонович Сатторов Бухоро вилоятида ўрганишлар олиб борди.

Ташриф давомида дастлабки манзил сифатида Бухоро вилояти ИИБ Тиббиёт бўлими госпитали фаолияти кўздан кечирилди. Капитал таъмирланиб, замонавий қиёфа касб этган ушбу масканда ходимлар, фахрийлар ва уларнинг оила аъзолари учун яратилган шароитлар ўрганилди. Бугунги кунда 96 нафар бемор даволанаётган шифохонанинг моддий-техник базасини янада бойитиш мақсадида, нафақат ходимлар, балки аҳолига ҳам сифатли пуллик тиббий хизмат кўрсатишни йўлга қўйиш бўйича таклифлар билдирилди.

Шундан сўнг, вазир ўринбосари ИИВ Бухоро академик лицейида бўлиб, ўқув жараёнлари ва ёшлар тарбияси билан танишди. Хусусан, 24 нафар ёшлар билан профилактик суҳбатлар ўтказилди. Лицей ўқувчиларининг соғлом овқатланиш рационини қайта кўриб чиқиш, таълим сифатини оширишда ИИВ Академияси профессор-ўқитувчилари билан масофавий дарсларни ташкил этиш бўйича аниқ топшириқлар берилди.

Тизим ходимлари фарзандларини ижтимоий қўллаб-қувватлаш мақсадида, «Юлдузча» мактабгача таълим ташкилотига ташриф буюрилди. Ҳозирда 248 нафар тарбияланувчи таҳсил олаётган ушбу муассасада болаларни ватанпарварлик руҳида тарбиялашда «Корея тажрибаси»дан фойдаланиш, «Боғча-музей» лойиҳасини татбиқ этиш ҳамда болаларда фавқулодда вазиятларда тўғри ҳаракат қилиш кўникмаларини шакллантириш бўйича кўрсатмалар берилди.

Ўрганишлар давомида вилоят Ички ишлар бошқармасида ўтказилган йиғилишда Президентимизнинг жорий йил 27 январь куни ўтказилган йиғилишида белгилаб берилган устувор вазифалар ижроси юзасидан амалга оширилаётган ишлар атрофлича таҳлил қилинди. Бу борадаги мавжуд муаммолар танқидий руҳда муҳокама этилиб, аниқланган камчиликларни бартараф этиш ҳамда фаолият самарадорлигини ошириш юзасидан аниқ вазифалар белгилаб берилди.

Навбатдаги манзилда, замонавий технологияларни соҳага жорий этиш аҳволи Тезкор бошқарув маркази фаолияти мисолида таҳлил қилинди. Вилоят бўйича 14 мингдан ортиқ кузатув камералари интеграция қилинган, 46 та сервер ва сунъий интеллектга асосланган «Қалқон» дастури орқали бошқарилаётган тизим имкониятлари юқори баҳоланди. Жамоат жойларидаги хавфсизликни тўлиқ рақамлаштириш орқали жиноятчиликни жиловлаш самарадорлигини ошириш вазифаси юклатилди.

Ташриф якунида Бухоро шаҳридаги «С.Айний» маҳалласида бўлиб, «маҳалла еттилиги» фаолияти ўрганилди. 7 мингдан ортиқ аҳоли истиқомат қилувчи ушбу ҳудудда жиноятчиликни жиловлаш ва ҳуқуқбузарликларни эрта аниқлаш мақсадида Президентимиз топшириғига асосан, пойтахтда синовдан ўтган «Чилонзор тажрибаси»ни кенг жорий этиш бўйича тавсиялар берилди. Хусусан, маҳалланинг «Йўл харитаси»ни қайта кўриб чиқиш, ишсиз аҳоли бандлигини таъминлаш ва криминоген вазиятни барқарорлаштириш бўйича масъулларга аниқ муддатли топшириқлар белгилаб берилди.

Бухоро вилояти ИИБ Ахборот хизмати