Қашқадарёда жамоат хавфсизлигини мустаҳкамлашга қаратилган назорат тадбирлари кучайтирилди
2026-02-13 10:55:00 / Янгиликлар
Қашқадарё вилоятида жамоат хавфсизлигини таъминлаш, ҳуқуқбузарликларнинг олдини олиш ҳамда аҳоли учун хавфсиз муҳит яратиш мақсадида вилоят ИИБ бошлиғи, полковник Абдувохид Исмоилов томонидан Қарши шаҳри ҳудудида махсус назорат тадбирлари давом эттирилди.
Давлатимиз раҳбарининг 27 январдаги видеоселектор йиғилишида белгиланган топшириқлар ижросини таъминлаш доирасида бошқарма бошлиғи Геолог МФЙда ўрганиш ишларини олиб борди. У ерда маҳалла еттилиги фаолияти, криминоген вазият таҳлили, жиноятчиликнинг олдини олиш бўйича маҳалла профилактика инспектори ҳамда маҳаллага бириктирилган масъуллар томонидан тақдимотлар тингланди. Ўрганиш якунида масъулларга ҳудудда хавфсизликни мустаҳкамлаш, аҳоли билан манзилли ишлаш ҳамда мавжуд камчиликларни бартараф этиш бўйича аниқ топшириқлар берилди.
Шундан сўнг назорат тадбири Алишер Навоий истироҳат боғи ҳамда АСИ Парк ҳудудида давом эттирилди. Бу ерда жамоат хавфсизлигини таъминлаш ва жиноятчиликнинг олдини олиш мақсадида юзни аниқлаш имкониятига эга, ҳар бир кириб келаётган шахсни идентификация қилувчи камералар тизими ўрганилди. Камераларни Миллий гвардия ва маҳалла профилактика инспектори билан тўлиқ интеграция қилиш бўйича аниқ топшириқлар берилди.
Шунингдек, истироҳат боғига келувчи ёшлар учун кўнгилочар жойлар, миллий ўйинлар ва спорт машғулотларини ташкил этиш масалалари муҳокама қилинди. Маҳалла еттилиги ва масъулларга аҳоли, айниқса ёшлар билан манзилли ишлаш, хавфсиз ва соғлом муҳитни шакллантириш бўйича тегишли вазифалар юклатилди.
Тадбир якунида ҳудудларда барқарор ва хавфсиз ижтимоий муҳитни таъминлаш, профилактик ишларни кучайтириш ҳамда ёшлар фаолиятини қўллаб-қувватлаш бўйича тизимли чора-тадбирлар белгилаб олинди.
Қашқадарё вилояти ИИБ Ахборот хизмати