Андижон вилояти ИИБ раҳбарияти томонидан Андижон туманида аҳолининг ижтимоий ва ҳуқуқий масалаларига бағишланган кенг қамровли сайёр қабул ташкил этилди
2026-02-13 10:50:00 / Янгиликлар
Андижон вилояти ИИБ бошлиғи томонидан Андижон туманида аҳолининг ижтимоий ва ҳуқуқий масалалардаги мурожаатларини ҳал этишга қаратилган сайёр қабул ўтказилди.
Аҳолининг ижтимоий ва ҳуқуқий масалаларга доир мурожаатларини жойида кўриб чиқиш, фуқароларни ўйлантираётган муаммоларни бевосита ўрганиш ҳамда уларнинг ечимига кўмаклашиш мақсадида жорий йилнинг 12 февраль куни Андижон вилояти ИИБ бошлиғи, полковник Санжар Джабаров томонидан Андижон туманининг Нўхатак маҳалласи ҳудудида сайёр қабул ташкил этилди.
Сайёр қабулда ички ишлар органлари масъул ходимлари билан бир қаторда тегишли давлат идоралари ва ташкилотлар вакиллари ҳам иштирок этди. Бу эса фуқаролар томонидан кўтарилган масалаларни ҳар томонлама ва тезкор тарзда кўриб чиқиш имконини берди.
Қабул жараёнида фуқаролар ишга жойлашиш, тадбиркорлик фаолиятини йўлга қўйиш, кредит маблағлари ажратиш, Ўзбекистон Республикаси фуқаролигини тасдиқловчи ID карталар олиш, пробация ҳисобидаги шахсларга оид масалалар, шунингдек, бошқа ижтимоий ва ҳуқуқий муаммолар юзасидан мурожаатлар билан иштирок этдилар. Барча мурожаатлар белгиланган тартибда рўйхатга олиниб, кўриб чиқилди.
Шу билан бирга, ички ишлар органларига бириктирилган ёшларнинг мурожаатларини ҳал этишга алоҳида эътибор қаратилди. Ёшлар томонидан билдирилган таклиф ва масалалар атрофлича ўрганилди.
Сайёр қабул давомида айрим мурожаатлар жойида ижобий ҳал этилди. Қўшимча ўрганиш талаб этувчи масалалар эса назоратга олиниб, улар юзасидан масъулларга аниқ вазифа ва топшириқлар берилди.
Андижон вилояти ИИБ раҳбарияти томонидан аҳоли мурожаатларини жойларда кўриб чиқиш, фуқаролар билан очиқ мулоқот ўтказиш амалиёти изчил давом эттирилмоқда. Бундай сайёр қабулларни келгусида ҳам шаҳар ва туманларда ташкил этиш режалаштирилган.
Андижон вилояти ИИБ Ахборот хизмати