Бухоро вилояти Қоровулбозор туманида жамоат хавфсизлиги ва аҳоли билан ишлаш самарадорлигини оширишга қаратилган очиқ мулоқотлар ўтказилди
2026-02-11 10:35:00 / Янгиликлар
Қоровулбозор туманида Бухоро вилояти Ички ишлар бошқармаси бошлиғи ҳамда туман ҳокими иштирокида жамоат хавфсизлигини таъминлаш, ҳуқуқбузарликлар профилактикаси ва аҳоли билан ишлаш самарадорлигини оширишга қаратилган қатор учрашувлар ўтказилди. Уларда профилактика инспекторлари, пробация назоратидаги фуқаролар ҳамда ёшлар билан очиқ мулоқотлар ташкил этилди.
Профилактика инспекторлари билан бўлиб ўтган кенгайтирилган учрашувда тумандаги криминоген вазият чуқур таҳлил қилиниб, жиноятчиликнинг олдини олишдаги камчиликлар танқидий руҳда муҳокама этилди. Раҳбарлар томонидан ҳар бир ходимдан аниқ натижа ва манзилли иш талаб этилди. Шу билан бирга, самарали фаолият юритаётган инспекторларни қўллаб-қувватлаш мақсадида «Яшил маҳалла» мезонлари асосида янги рағбатлантириш тизими жорий этилиши маълум қилинди.
Шу куни туман ҳокимлиги биносида пробация ҳисобида турган фуқаролар билан ҳам очиқ мулоқот ўтказилди. Учрашувда уларни қийнаётган ижтимоий-маиший муаммолар тингланиб, бандлик, тадбиркорлик, қишлоқ хўжалиги ва ижтимоий ёрдам масалалари бўйича тегишли кўрсатмалар берилди. Раҳбарлар ҳар бир мурожаатни қонуний тартибда ҳал этиш бўйича масъулларга вазифалар юклаб, фуқароларни жамиятга тўлақонли қайтариш муҳим эканини таъкидладилар.
Шунингдек, 200 нафарга яқин ёшлар билан ўтказилган учрашувда ёшларнинг ҳуқуқий онгини ошириш, уларни жиноятчиликдан йироқ тутиш ва фаол ҳаётий позицияга йўналтириш масалаларига алоҳида эътибор қаратилди. Самимий мулоқот давомида ёшлар ўз муаммо ва таклифларини билдириб, уларни ҳал этиш юзасидан аниқ чора-тадбирлар белгилаб олинди.
Мазкур учрашувлар жамоат хавфсизлигини мустаҳкамлаш, аҳоли билан очиқ ва ишончли мулоқотни йўлга қўйиш ҳамда туманда ижтимоий барқарорликни таъминлашга хизмат қилди.
Бухоро вилояти ИИБ Ахборот хизмати