Ички ишлар вазирлиги раҳбарияти иштирокида жиноятчилик сарҳисоби, хизмат интизоми ҳамда оммавий тадбирларда хавфсизликни таъминлашга доир комплекс масалалар муҳокама қилинди
2026-02-11 13:20:00 / Янгиликлар
Жорий йилнинг 10 февраль куни Ўзбекистон Республикаси Ички ишлар вазири Азиз Ташпулатов раҳбарлигида видеоселектор йиғилиши бўлиб ўтди.
Унда вазир ўринбосарлари, соҳавий хизматлар раҳбарлари ҳамда ҳудудлардан Қорақалпоғистон Республикаси ички ишлар вазири, Тошкент шаҳри ва вилоятлар ИИББ–ИИБ бошлиқлари, уларнинг ўринбосарлари ҳамда барча соҳавий хизматлар раҳбарлари иштирок этдилар.
Йиғилишнинг кун тартибига мувофиқ Давлат раҳбарининг топшириқларини ижросини таъминлаш жараёнлари, хусусан мамлакатимиз ҳудудларида, хусусан Чилонзор туманида “пойтахт намунаси” асосида маҳаллаларда криминоген вазиятни яхшилашга қаратилган масалалар муҳокама қилинди.
Таъкидланганидек, “пойтахт намунаси” доирасида ҳар бир маҳалла кесимида аниқ таҳлиллар олиб бориш, “хавф гуруҳи”га кирувчи шахслар билан манзилли ишлаш, ёшлар ўртасида жиноятчилик ва ҳуқуқбузарликларнинг олдини олишга қаратилган профилактик чора-тадбирларни тизимли йўлга қўйиш муҳим аҳамият касб этади. Шунингдек, ижтимоий ҳимояга муҳтож оилалар, ишсиз фуқаролар ва таълим муассасаларидаги ёшлар билан яқин ҳамкорликни йўлга қўйиш орқали жиноятчиликка мойилликни бартараф этиш чоралари белгилаб олинди.
Шунингдек, ички ишлар органлари тизимида фуқаролар мурожаатлари билан ишлашнинг ҳолати атрофлича таҳлил қилинди, мавжуд камчиликлар танқидий кўриб чиқилди. Келгусида мурожаатларни ўз вақтида, қонуний ва холисона кўриб чиқиш, аҳоли билан мулоқотни янада кучайтириш ҳамда фуқаролар ишончини оширишга қаратилган устувор вазифалар белгиланди.
Шу билан бирга, муқаддас “Рамазон” ойи давомида, айниқса “Таровиҳ” намозлари вақтида жамоат жойларида хавфсизликни таъминлаш, йўл ҳаракати хавфсизлиги, оммавий тўпланиш жойларида тартиб-интизомни сақлаш масалалари муҳокама қилинди. Мазкур даврда фуқаролар учун хавфсиз ва осойишта муҳит яратиш мақсадида ички ишлар органлари томонидан амалга оширилиши лозим бўлган чора-тадбирлар белгилаб берилди.
Мазкур йиғилишда белгиланган вазифаларнинг ўз вақтида ва сифатли ижросини таъминлаш, ижро интизомини кучайтириш, ҳар бир раҳбар ва ходимнинг шахсий жавобгарлигини ошириш устувор вазифа сифатида белгиланиб, ички ишлар органлари фаолияти самарадорлигини янада ошириш зарурлиги таъкидланди.