Қашқадарё вилоятида жамоат хавфсизлигини таъминлаш, ҳуқуқбузарликларнинг олдини олиш ва аҳоли учун хавфсиз муҳитни яратиш мақсадида вилоят ИИБ раҳбарияти томонидан Қарши шаҳри ҳудуди бўйлаб махсус назорат тадбирлари ўтказилди
2026-02-10 14:55:00 / Янгиликлар
Давлатимиз раҳбарининг жорий йил 27 январь кунидаги видеоселектор йиғилишида берилган топшириқлар ижросини таъминлаш мақсадида ташкил қилинган тадбир давомида шаҳар ҳудудида жойлашган савдо шохобчалари, йирик бозорлар ҳамда аҳоли тўпланадиган гавжум жойларда кириш-чиқиш йўлакларига ўрнатилган кузатув камераларининг ишлаш ҳолати, уларнинг қамров даражаси ва техник талабларга мувофиқлиги ўрганиб чиқилди.
Шунингдек, жамоат тартибини сақлаш ва профилактик чора-тадбирлар самарадорлигини ошириш мақсадида масъуллар «Қарлиқхона» маҳалласида жойлашган деҳқон бозорида ҳам бўлишди. Маълумотларга кўра, мазкур бозорда кунига 20 мингга яқин одам ташриф буюради. Демакки, аҳоли хавфсизлигини таъминлаш, харидорлар учун қулай шароитлар яратиш долзарб масала. Ўрганиш давомида бозордаги кузатув камераларининг ҳолати батафсил текширилди. Автотураргоҳларни тартибга солиш бўйича топшириқлар берилди. Бозор ичида жойлашган савдо расталари, шохобчаларида тартиб ва хавфсизликни таъминлаш чоралари бўйича вазифалар юклатилди. Шунингдек, «Табассум» маҳалласида ҳам ўрганиш ишлари олиб борилди. Маҳаллада профилактика инспекторлари фаолияти, маҳалла фаоллари билан ҳамкорлик, аҳоли билан олиб борилаётган тушунтириш ишлари, шунингдек, маҳалла ҳудудида хавфсизликни таъминлашга қаратилган инфратузилма ҳолати кўздан кечирилди. Аҳоли яшаш пункти ҳудудига кирувчи «Кўкча нур» деҳқон ва озиқ-овқат бозорида хавфсизликни таъминлаш бўйича қилинган ишлар, сунъий нарх-наво ошишининг олдини олиш бўйича амалга оширилаётган ишлар ҳолати ўрганилди.
Назорат тадбири якунида аниқланган камчиликларни бартараф этиш, видеокузатув тизимларини янада такомиллаштириш, профилактик ишларни кучайтириш ҳамда жамоат хавфсизлигини таъминлаш борасида масъулларга аниқ топшириқлар берилди. Шу орқали шаҳарда хавфсиз муҳитни мустаҳкамлаш, фуқароларнинг тинч ва осойишта ҳаёт кечиришини таъминлаш асосий мақсад қилиб белгиланди.
Қашқадарё вилояти ИИБ Ахборот хизмати