Наманган шаҳар ҳокимлигида бозорлар фаолиятини тартибга солиш, яширин иқтисодиётни қисқартириш ва хавфсизликни таъминлаш чора-тадбирлари масалаларига бағишланган йиғилиш бўлиб ўтди
2026-02-10 10:35:00 / Янгиликлар
Вилоят ҳокими Шавкатжон Абдураззақов раҳбарлигида ўтказилган мазкур йиғилишда ҳуқуқни муҳофаза қилувчи органлар раҳбарлари, масъул ходимлар ҳамда соҳага дахлдор ташкилотлар вакиллари иштирок этди.
Унда ҳудудларда тадбиркорликни қўллаб-қувватлаш, иқтисодиётни барқарор ривожлантириш ва аҳоли даромадларини оширишга қаратилган ислоҳотлар ижроси, хусусан, бозорлар фаолиятини белгиланган меъёр ва талаблар асосида ташкил этиш масалалари атрофлича муҳокама қилинди.
Таҳлиллар давомида айрим бозорларда санитария-гигиена ва ёнғин хавфсизлиги талабларига тўлиқ риоя этилмаётгани, нарх-навони назорат қилишдаги камчиликлар ҳамда яширин иқтисодиёт ҳолатларининг мавжудлиги танқидий кўриб чиқилди.
Йиғилишда Наманган вилояти ИИБ бошлиғи томонидан соҳада амалга оширилаётган ишлар ва устувор вазифалар, шунингдек, жамоат хавфсизлигини таъминлаш юзасидан маълумот берилди. Шунингдек, Наманган шаҳар, Давлатобод ва Янги Наманган туманларидаги бозорларда солиқ базасини кенгайтириш, фаолиятни рақамлаштириш, шаффофликни таъминлаш ҳамда мавжуд камчиликларни бартараф этиш бўйича масъул раҳбарларнинг ҳисоботлари тингланди.
Муҳокама якунида аниқланган камчиликларни бартараф этиш, бозорларда шаффоф ва соғлом рақобат муҳитини шакллантириш ҳамда назорат тадбирларини кучайтириш юзасидан аниқ топшириқлар берилди.
Наманган вилояти ИИБ Ахборот хизмати