Андижон вилояти ИИБ бошлиғи томонидан Асака туманида Президент қарорлари ижроси ҳамда “Чилонзор тажрибаси” асосида амалга оширилаётган ишлар ўрганилди
2026-02-10 10:20:00 / Янгиликлар
Андижон вилояти ИИБ бошлиғи томонидан Асака туманида Президентимизнинг жорий йил 5-январь куни қабул қилинган ПҚ–1 ва ПҚ–2-сон қарорлари ижроси, шунингдек, “Чилонзор тажрибаси” асосида жамоат хавфсизлигини таъминлаш борасида амалга оширилаётган ишлар ўрганилди.
Хусусан, туманининг Беруний маҳалласида жиноятчилик ва ҳуқуқбузарликларни барвақт олдини олиш юзасидан “маҳалла еттилиги” томонидан олиб борилаётган ишлар танқидий муҳокама қилиниб, ишлаб чиқилган йўл хариталари асосида амалга оширилаётган чора-тадбирлар ва уларнинг натижадорлигига алоҳида эътибор қаратилди.
Шунингдек, низоли оилалар билан ишлаш, ёшлар ва хотин-қизларнинг бандлигини таъминлаш, ғайриижтимоий хулқ-атворга эга шахслар билан манзилли профилактик ишларни янада кучайтириш юзасидан масъулларга тегишли топшириқлар берилди.
Бундан ташқари, “Чилонзор тажрибаси” доирасида хавфсиз муҳитни шакллантириш, маҳаллаларни рақамлаштириш ҳамда жамоат хавфсизлигини замонавий технологиялар асосида таъминлаш бўйича амалга оширилаётган ишлар ҳам яқиндан кўздан кечирилди.
Жумладан, Асака тумани марказидаги савдо, хизмат кўрсатиш ва ижтимоий соҳа объектларида Қўриқлаш хизмати томонидан ўрнатилган сигнализация ва қўриқлов воситаларининг техник ҳолати ўрганилиб, тадбиркорларга қўриқлаш тизимига уланишнинг аҳамияти тушунтирилди.
Шу билан бирга, марказий кўчалар ва жамоат жойларида тартиб-интизомни таъминлаш, жиноят содир этилиши эҳтимоли юқори бўлган ҳудудларда барвақт профилактика чораларини кучайтириш мақсадида рақамлаштириш жараёнларини жадаллаштириш вазифалари белгилаб берилди.
Андижон вилояти ИИБ Ахборот хизмати