Навоий вилояти ИИБ раҳбарияти томонидан Қўриқлаш хизмати фаолияти ва “Пойтахт тажрибаси” асосидаги тезкор-штаб фаолияти ўрганилди
2026-02-09 09:00:00 / Янгиликлар
Навоий вилояти Ички ишлар бошқармаси бошлиғи Қўриқлаш хизмати ходимларининг хизмат фаолияти жараёнларини кўздан кечирди ҳамда “Пойтахт тажрибаси” асосида ташкил этилган тезкор-штаб иши билан яқиндан танишди.
Қўриқлаш хизматида ўтказилган ўрганишлар давомида Бошқарма бошлиғи ва ШХББ Навоий вилояти бўйича бўлими раҳбари томонидан ходимларга хизмат интизоми, қонунчиликка қатъий риоя этиш, ички тартиб-интизом талабларига амал қилиш юзасидан тушунтиришлар берилди.
Ҳар бир ходим ўз зиммасига юклатилган вазифани сидқидилдан бажариши, фуқаролар ва ташкилотлар ишончини оқлаши зарурлиги алоҳида таъкидланди.
Шунингдек, Бошқарманинг Маънавий-маърифий ишлар ва кадрлар билан таъминлаш хизмати масъуллари томонидан ходимларнинг доимий олиб юриши лозим бўлган ҳужжатлари ҳамда махсус воситалари текширилди.
Айрим йўналишларда аниқланган камчиликлар ўрганилиб, уларни бартараф этиш бўйича тегишли кўрсатмалар берилди. Хизмат жараёнида ҳушёрликни ошириш, тезкор ҳаракат қилиш кўникмаларини мустаҳкамлаш ва замонавий ахборот-техник воситалардан самарали фойдаланиш юзасидан топшириқлар белгилаб берилди.
Шу куни Навоий вилояти ИИБ бошлиғи, шаҳар ҳокими ва бошқа масъуллар Навоий шаҳар ҳокимлигида “Пойтахт тажрибаси” асосида ташкил қилинган тезкор-штаб фаолияти билан ҳам танишди.
Айни пайтда Навоий шаҳридаги 33 та маҳаллага 17 нафар раҳбар ҳамда 33 нафар масъул ходим бириктирилган бўлиб, улар томонидан жойларда криминоген вазиятни барқарорлаштириш, аҳоли билан манзилли ишлаш, ижтимоий муаммоларни аниқлаш ва бартараф этиш бўйича тизимли ишлар амалга оширилмоқда.
Ўрганишлар чоғида маҳаллаларда хавфсиз муҳитни шакллантириш, жиноят ва ҳуқуқбузарликларнинг олдини олиш, профилактик тадбирлар самарадорлигини ошириш, замонавий технологиялар ва видеокузатув тизимларидан фойдаланиш ҳолати кўриб чиқилди.
Тезкор-штаб орқали келиб тушаётган мурожаатларни тезкор кўриб чиқиш, муаммоларни жойида ҳал этиш ва масъул ташкилотлар ўртасида ўзаро ҳамкорликни кучайтириш масалаларига алоҳида эътибор қаратилди.
Масъуллар томонидан мазкур тизимни янада такомиллаштириш, “Пойтахт тажрибаси”да эришилган ижобий натижаларни бошқа ҳудудларда ҳам жорий этиш, аҳоли билан мулоқотни кучайтириш ва профилактика ишларини фаоллаштириш бўйича тавсиялар берилди.
Навоий вилояти ИИБ Ахборот хизмати