Навоийда маҳаллаларда хавфсиз муҳит яратиш масалалари танқидий-таҳлилий руҳда муҳокама қилинди
2026-02-07 15:35:00 / Янгиликлар
Навоийда вилоят ҳокими раҳбарлигида маҳаллаларда хавфсиз муҳитни яратиш ва ҳуқуқбузарликларнинг барвақт олдини олишнинг самарали тизимини шакллантиришга қаратилган танқидий-таҳлилий йиғилиш бўлиб ўтди.
Унда вилоят ҳокимлиги, ҳуқуқни муҳофаза қилиш органлари вакиллари, хотин-қизлар ва ёшлар масалалари бўйича масъуллар ва маҳаллаларнинг еттилик етакчилари иштирок этишди. Вилоят ҳокими раислигида бўлиб ўтган йиғилишда криминоген вазият Кармана тумани маҳаллалари мисолида кўриб чиқилди. Вилоят прокурори, Ички ишлар бошқармаси бошлиғи ҳамда Кармана тумани ҳокими ва тумандаги “Кумушкон” маҳалласи еттилиги сўзга чиқиб, ҳар бири ўз соҳаси кесимида бажарилиши лозим бўлган чора-тадбирлар хусусида сўз юритди.
Вилоятдаги “қизил“ тоифадаги маҳаллаларни “яшил“ тоифага олиб чиқиш, оилаларни камбағалликдан тўлалигича чиқариш, ҳар бир фуқаронинг бандлигини таъминлаш, жиноятчиликни бартараф этиш масалалари биргаликда ечилсагина, ижобий ва ҳақиқий натижага эришилиши таъкидланиб, ҳамкорликда амалга ошириладиган режалар белгилаб олинди.
Шунингдек, йил давомида ижобий натижалар кўрсатган маҳаллалар еттилигининг фаолияти эътироф этилиб, бир гуруҳ профилактика инспекторлари вилоят ҳокими томонидан замонавий компютер жамланмаси ҳамда ташаккурнома билан тақдирланди.
Навоий вилояти ИИБ Ахборот хизмати