Қашқадарё вилояти Муборак тумани ИИБ биноси капитал таъмирдан сўнг фойдаланишга топширилди
2026-02-05 15:30:00 / Янгиликлар
Муборак туманида Ички ишлар бўлимининг капитал таъмирдан чиқарилган янги биноси тантанали равишда фойдаланишга топширилди. Очилиш маросимида вилоят ҳокими Муротжон Азимов ва соҳа раҳбарлари иштирок этиб, мамлакатимизда тизимни халқчил ва профессионал тузилмага айлантириш борасидаги ислоҳотлар фуқаролар хавфсизлигини таъминлашда муҳим омил бўлаётганини таъкидладилар. Мазкур замонавий мажмуа аҳоли билан яқин ҳамкорлик қилиш ва қонун устуворлигини мустаҳкамлаш йўлида хизмат қилади.
Янги бинода соҳа ходимлари учун барча қулайликларга эга шинам хизмат хоналари, кутубхона, маънавият бурчаги ҳамда қишки спорт саройи ва воркаут майдончалари барпо этилди. Шунингдек, миграция ва пробация бўлимлари учун алоҳида қулайликлар ташкил этилиб, фаолиятида ўрнак кўрсатган бир гуруҳ ходимлар қимматбаҳо совғалар билан тақдирланди. Яратилган бундай шарт-шароитлар тумандаги қарийб юз минг нафар фуқаро осойишталигини сифатли таъминлаш ва жиноятчиликни барвақт олдини олишга қаратилган.
Тадбир доирасида вилоят ҳокими профилактика инспекторлари билан очиқ мулоқот ўтказиб, ҳудуддаги криминоген вазиятни барқарорлаштириш ва Президент қарорлари ижросини муҳокама қилди. Мулоқот давомида соҳа вакилларининг хизмат фаолиятидаги муаммолар ва маиший эҳтиёжлари тингланиб, уларни ҳал этиш бўйича аниқ чоралар белгиланди. Бу саъй-ҳаракатларнинг барчаси жамоат хавфсизлигини таъминлашда профилактика инспекторларининг ролини ошириш ва аҳоли муаммолари билан яқиндан ишлашга хизмат қилади.
Қашқадарё вилояти ИИБ Ахборот хизмати