Ўзбекистон Республикаси Ички ишлар вазирлиги

Йиғилишда Ички ишлар вазири иштирокида вилоят ҳокими, ҳуқуқни муҳофаза қилиш органлари раҳбарлари, туман ва шаҳар ҳокимлари, ҳамкор ташкилотлар масъуллари, шунингдек, ҳудудий ички ишлар бўлинмалари раҳбарлари ҳамда профилактика инспекторлари ҳудудий студиялар орқали қатнашдилар.

Тадбир давомида Самарқанд шаҳрида жиноятчилик даражасининг ошгани кескин танқид остига олинди. Шу билан бирга, кибержиноятчилик, гиёҳвандлик билан боғлиқ ҳуқуқбузарликлар, уюшган жиноятчиликка қарши курашиш ҳамда яширин иқтисодиётни келтириб чиқараётган омилларни бартараф этиш масалалари атрофлича муҳокама қилинди.

Муҳокамалар натижасида 2026 йилда Самарқанд вилоятида хавфсиз ҳудудларни шакллантиришга қаратилган қатор аниқ ва мақсадли чора-тадбирлар белгиланди. Жумладан, вилоят ҳудудидаги 1063 та маҳаллада хавфсиз муҳитни таъминлаш бўйича комплекс ишлар олиб бориш, ижтимоий профилактика доирасида “хонадонма-хонадон” ишлашнинг намунавий механизмини жорий этиш режалаштирилди.

Шунингдек, наркожиноятчилик ва уюшган жиноятчиликка қарши курашиш, аёллар ва болаларга нисбатан зўравонлик ҳолатларининг олдини олиш борасида масъул идоралар билан ҳамкорликда тизимли чоралар кўриш, туман ва шаҳарларда, хусусан уюшмаган ёшлар бандлигини таъминлашга қаратилган “Самарқанд шаҳри тажрибаси”ни жорий этиш вазифалари белгиланди.

Вилоят ҳудудида қўшимча замонавий видеокузатув воситаларини ўрнатиш ва уларни Ички ишлар бошқармасининг “Ягона тезкор бошқарув маркази”га босқичма-босқич улаш, шунингдек, кўнгилочар масканлар, 24 соат фаолият юритувчи гастрономик кўчалар, савдо марказлари ҳамда оммавий тадбирлар ўтказиладиган ҳудудларда жамоат тартибини таъминлаш бўйича комплекс чоралар белгилаб олинди.

Йиғилишда интернет орқали содир этилаётган фирибгарлик, шахсий маълумотларни қонунга хилоф равишда қўлга киритиш ва электрон тўлов тизимларига тажовуз қилиш билан боғлиқ жиноятларнинг олдини олиш масалаларига алоҳида эътибор қаратилди. Бу борада ахборот технологиялари соҳасида жиноятларни барвақт аниқлаш ва профилактика қилишга қаратилган замонавий таҳлил механизмларини жорий этиш вазифаси қўйилди.

Бундан ташқари, ҳар бир оғир ва ўта оғир жиноят ҳолати бўйича унинг келиб чиқиш сабаблари ва шарт-шароитларини чуқур таҳлил қилиш, жиноят содир этилишига олиб келаётган омилларни бартараф этиш ҳамда профилактик ишларни кучайтириш юзасидан масъул тузилмаларга аниқ топшириқлар берилди.

Криминоген вазияти мураккаб бўлган ҳамда “қизил” тоифага киритилган маҳаллаларга бириктирилган масъул раҳбар ва ходимларга аниқ вазифалар белгилаб берилди.

Тадбир якунида иштирокчиларнинг таклиф ва мулоҳазалари тингланиб, белгиланган вазифаларни тизимли ва самарали амалга оширишга қаратилган, истиқболли чора-тадбирларни ўз ичига олган дастур ишлаб чиқиш вазифаси юклатилди.