Ўзбекистон Республикаси Ички ишлар вазирлиги

Жумладан, Самарқанд вилояти ички ишлар бошқармаси бошлиғи томонидан ҳуқуқни муҳофаза қилиш органлари раҳбар ва ходимлари, шунингдек, ҳамкор ташкилотлар масъуллари иштирокида маҳаллаларда хавфсиз муҳитни шакллантириш ва жамоат хавфсизлигини таъминлаш масалаларига бағишланган кенгайтирилган хизмат олди йўриқномаси ўтказилди.

Йўриқнома давомида патрул-пост, йўл-патрул, қўриқлаш ва профилактика хизматлари томонидан тун-у кун, уч сменали хизматни ташкил этиш жараёнида эътибор қаратилиши лозим бўлган асосий йўналишлар ва устувор вазифалар атрофлича тушунтириб берилди.

Тадбир давомида Ички ишлар вазирлигининг ишчи гуруҳи томонидан маҳаллаларда амалга оширилаётган ишлар ҳамда кўрилаётган чора-тадбирлар билан яқиндан танишиш мақсадида ҳудудий ўрганишлар олиб борилди.

Хусусан, Самарқанд шаҳрида криминоген вазияти нисбатан оғир бўлган Расадхона маҳалласида ўрганишлар ўтказилди. Унда ҳудуддаги жиноятчилик ҳолатига бевосита таъсир кўрсатувчи “Самарқанд–Тошкент” ва “Самарқанд–Бухоро” йўналишларида жойлашган автовокзаллардаги криминоген вазият атрофлича таҳлил қилинди.

Ички ишлар вазири томонидан мазкур объектларда жамоат хавфсизлигини мустаҳкамлаш, фуқаролар ва йўловчиларнинг осойишталигини таъминлаш мақсадида огоҳлантирувчи техник воситаларни ўрнатиш, патрул-пост хизмати учун махсус жиҳозланган назорат масканларини ташкил этиш, шунингдек, аҳолини доимий равишда ҳушёрликка чорловчи тарғибот ва тушунтириш ишларини кучайтириш бўйича аниқ топшириқлар берилди.

Самарқанд шаҳар бўйича ИИО ФМБ ҳузуридаги Қўриқлаш бўлими фаолияти ўрганилиб, объектларни марказлаштирилган қўриқлаш пультига улаш ва уларни техник қўриқловга олиш борасида амалга оширилаётган ишлар танқидий руҳда таҳлил қилинди.

Шу билан бирга, аҳолининг мол-мулкини ишончли ҳимоя қилиш, қўриқлаш хизматлари фаолиятини янада такомиллаштириш ҳамда ушбу соҳада рақамлаштириш жараёнларини жадаллаштириш бўйича аниқ ва устувор вазифалар белгилаб берилди.

Самарқанд шаҳрининг Мустақиллик маҳалласида ҳам ўрганишлар ўтказилиб, маҳалла “еттилиги” томонидан ҳудудда жиноят ва ҳуқуқбузарликларнинг олдини олиш борасида амалга оширилаётган ишлар сарҳисоб қилинди.

Мазкур ҳудудда жойлашган 37-сонли умумтаълим мактабида хавфсизлик масалалари кўздан кечирилиб, транспорт оқими зичлигини инобатга олган ҳолда ўқувчилар хавфсизлигини таъминлаш мақсадида мактаб атрофидаги йўлларда сунъий нотекисликлар (тезликни чекловчи воситалар) барпо этиш, шунингдек, таълим муассасасида қўриқлаш хизмати ходимлари фаолиятини ташкил этиш бўйича топшириқлар берилди.

Шунингдек, Самарқанд вилоятининг Пастдарғом туманида криминоген вазияти оғир ҳисобланган “Амир Темур”, “Самарқанд”, “Сазаган”, “Пўлатчи” ва “Шароф Рашидов” маҳаллаларига хизмат кўрсатувчи 133-сонли марказий таянч пункт фаолияти ўрганилиб, Давлат раҳбарининг жорий йилда қабул қилинган 1 ва 2-сонли қарорлари ижросини сифатли ва ўз вақтида таъминлаш юзасидан аниқ топшириқлар берилди.

Бундан ташқари, савдо ва хизмат кўрсатиш мажмуаларида ўтказилган ўрганишлар жараёнида ёнғин хавфсизлиги қоидаларига сўзсиз ва тўлиқ риоя этиш, мавжуд камчиликларни ўз вақтида бартараф этиш ҳамда фуқаролар ҳаёти ва соғлиғига таҳдид солувчи ҳар қандай кўнгилсиз ҳолатларнинг олдини олиш мақсадида масъул раҳбарларга аниқ ва қатъий топшириқлар берилди.

Хусусан, ёнғинга қарши техник воситаларнинг соз ҳолатда сақланиши, эвакуация йўлакларининг очиқ ва хавфсиз бўлиши, ходимлар ўртасида ёнғин хавфсизлиги қоидалари бўйича тушунтириш ишларини кучайтириш зарурлиги алоҳида таъкидланди.

Айни пайтда мазкур ўрганиш ишлари вилоят ҳудудида изчил давом этмоқда.