Сурхондарё вилояти Жарқўрғон туманида жамоат хавфсизлигини таъминлашда “Чилонзор тажрибаси” жорий этилмоқда
2026-02-03 09:55:00 / Янгиликлар
Жарқўрғон туманида ПҚ-1 ва ПҚ-2 қарорлари ижроси доирасида “Чилонзор тажрибаси” асосида жамоат хавфсизлигини таъминлаш, жиноятчилик профилактикасини кучайтириш, бозорлар фаолиятини рақамлаштириш ва яширин иқтисодиётга қарши курашиш бўйича тизимли ишлар ташкил этилди.
Ҳудудларда хавфсиз муҳитни шакллантириш, жамоат хавфсизлигини таъминлаш, жиноятчилик ва ҳуқуқбузарликлар профилактикасини кучайтириш, шунингдек, яширин иқтисодиётга қарши курашиш, бозорлар фаолиятини рақамлаштириш ҳамда савдо жараёнларини хавфсиз ва тартибли ташкил этиш бўйича аниқ вазифалар белгилаб берилди.
Мазкур топшириқлар ижросини таъминлаш мақсадида бугун Жарқўрғон туманида Жиноятчиликни жиловлашда “Чилонзор тажрибаси” асосида ишлар ташкил этилди. “Сурхон соҳили” маҳалласида жойлашган деҳқон ва озиқ-овқат бозори ҳудудида Сурхондарё вилояти ҳокимлиги, ҳуқуқни муҳофаза қилувчи органлар, коммунал соҳа ҳамда тегишли мутасадди ташкилотлар вакиллари иштирокида йиғин ўтказилди. Унда шаҳар ва туманлар студияларидан ҳокимликлар ҳамда алоқадор идоралар вакиллари “Zoom” платформаси орқали онлайн иштирок этди.
Тадбирда алоҳида эътибор ҳуқуқбузарликлар кўп кузатилаётган ва хавф даражаси юқори бўлган, шартли равишда “қизил” тоифага киритилган маҳаллаларга қаратилди. Бу ҳудудларда профилактик ишлар фақат умумий тарзда эмас, балки ҳар бир хонадон, ҳар бир оила кесимида олиб борилиши, таълим муассасалари, маҳалла ва ҳуқуқни муҳофаза қилувчи органлар ўртасидаги ҳамкорлик мутлақо янги, самарадор форматга ўтказилиши, марказий кўчалар ва бошқа жамоат жойларида тартиб-интизомни таъминлаш, жиноят содир этилиши эҳтимоли юқори бўлган жойларда жиноятчиликни барвақт олдини олиш мақсадида рақамлаштириш жараёнларини жадаллаштириш, яширин иқтисодиёт қисқартириш ҳамда белгиланган чора-тадбирларни ўз вақтида ва сифатли амалга ошириш бўйича масъулларга аниқ вазифалар юклатилди.
Шунингдек, вилоятнинг ҳар бир маҳалла кесимида вазиятни доимий таҳлил қилиш, “қизил” ҳудудларда комплекс профилактик ишларни кучайтириш, айниқса, оилавий-турмуш масалалари, ёшлар ва муқаддам судланган шахслар томонидан қайта жиноятлар содир этилишининг олдини олиш, шунингдек, ҳудудлардаги марказий бозорлар ва савдо комплексларида ишларни тизимли ташкил этиш ҳамда қисқа муддатларда рақамлаштириш жараёнларини якунлаш юзасидан тегишли кўрсатмалар берилди.
Сурхондарё вилояти ИИБ Ахборот хизмати